Onestidat—Pa Casualidad of pa Decision?
“AUNKE mi no tin e inclinacion pa esei, mi ta onesto tin biaha pa casualidad.” Asina e bandidu Autólico ta bisa den The Winter’s Tale di William Shakespeare. Esaki ta ilustrá un debilidad humano básico—nos inclinacion di haci malu, cu ta resultá for di un ‘curason traicionero.’ (Jeremías 17:9; Salmo 51:5; Romanonan 5:12) Pero esaki ta nificá cu nos no por scoge den e asuntu aki? Conducta birtuoso ta simplemente un asuntu di casualidad? Di ningun manera!
Promé cu e yunan di Israel a drenta e Tera Primintí, Moises a papia cu nan ora nan tabata den campamentu riba e sabana di Moab. El a pone dilanti nan dos opcion claro. Nan por a obedecé e mandamentunan di Dios i ricibí su bendicion of rechasá nan i cosechá e fruta amargo di picá. (Deuteronomio 30:15-20) Ta nan mester a scoge.
Ya cu nos tin boluntad liber, nos tambe por scoge. Ningun persona—ni Dios—no ta forsa nos haci bon of haci malu. Sin embargo, cu bon motibu algun por puntra, ‘Si nos curason ta incliná pa haci malu, con nos por practicá loke ta bon?’ Wel, un dentista ta examiná e djentenan cuidadosamente afin di detectá ‘caries’ of putrimentu promé cu e progresá muchu leu. Di igual manera, nos tin cu investigá nos curason figurativo en busca di debilidad i putrimentu moral. Pakico? Pasobra “for dje curason ta sali razonamentu malbado, matamentu, adulterio, fornicacion, ladronicia, testimonio falsu, blasfemia,” Jesus a bisa.—Mateo 15:18-20.
Pa conserbá un djente, un dentista tin cu eliminá completamente cualkier putrí cu e haña. Di igual manera, accion decisivo ta necesario pa core cu “razonamentu malbado” i mal deseonan dje curason. Dor di lesa i meditá riba e Palabra di Dios, e Bijbel, no solamente nos ta yega na conocé e camindanan di nos Creador sino tambe nos ta siña haci loke ta bon.—Isaías 48:17.
Rey David di Israel a probechá di un yudansa adicional necesario den e lucha pa haci loke ta bon. El a pidi den oracion: “Crea den mi asta un curason puru, O Dios, i pone den mi un spiritu nobo, unu constante.” (Salmo 51:10) Sí, dor di dependé riba Jehova Dios huntu cu oracion, nos tambe por vence nos inclinacion di haci loke ta malu i cultivá un “spiritu nobo” pa haci loke ta bon. Den e manera aki, nos lo no laga onestidad pa casualidad. Lo e ta un asuntu di decision.
[PLachi na página 21]
Mescos cu den David su caso, oracion na Jehova por yuda nos haci bon