Informe di Proclamadornan di Reino

“Laga Boso Lus Briya Dilanti Hende”

DEN su Sermon Riba Ceru, Jesus a bisa su disipelnan: “Boso ta e lus di mundu.” Siguientemente el a insta nan: “Laga boso lus briya dilanti hende, pa nan por mira boso obranan excelente i duna gloria na boso Tata cu ta den shelu.”—Mateo 5:14-16.

Na Italia hende a tuma nota dje obranan excelente di Testigonan di Jehova. Por ehempel, nan bon conducta ora di asistí na nan congresonan anual ta trece alabansa na Dios, manera e siguiente informenan ta confirmá:

▪ Pa hopi aña un señora na Terni, Italia, a yuda su yu muher manehá un cafeteria cu tabata situá cerca dje stadion den e stad ei. E ta conta: “Mi a ripará un diferencia grandi entre esnan cu a bini pa wega di futbol i e delegadonan n’e congresonan di Testigonan di Jehova einan. E Testigonan tabata mas modesto den nan bistí, i nan tabata onesto i respetuoso. Hopi biaha mi a puntra mi mes con hende di vários rasa por a sali asina bon cu otro.

“Un dia un Testigo a pará mi riba caya i a puntrá mi si mi tabata sa Dios su nomber. Mi no tabata sa, i ya cu mi tabata sa cu Testigonan di Jehova ta bon hende, mi a bai di acuerdo p’e bishitá mi. Mi tabatin pregunta tocante e condicion dje mortonan, cua el a contestá for di Bijbel. Sin vacilá, mi a aceptá un studio di Bijbel, i dos siman despues mi a cuminsá asistí na reunion.

“Na principio mi yu muher a oponé mi, pero mi conducta i determinacion a cambia su actitud. Mi a studia pa nuebe luna. Awe mi yu muher i su casá tin comentarionan apreciativo dje Testigonan cu ta cliente regular di nan cafeteria. Pa loke ta ami, mi a ser bautisá na un congreso den e stadion aki.”

▪ Despues di un congreso na Roseto degli Abruzzi, e gerente di un camping a remarcá: “Mi a ripará cu Testigonan di Jehova ta masha onesto den tur loke nan ta haci. Siman pasá, mi tabatin 40 di nan na mi camping, i nan no a causa ningun problema. Al contrario, nan ta e único hendenan cu ta bini i bisá bo cu nan tin un persona extra ta keda den nan ‘trailer’ of tent. Pa loke ta toca ami, nan ta e mihó clientenan cu bo por tin.”

▪ Despues dje mésun congreso, e gerente di un hotel a declará: “Testigonan di Jehova tur ta hendenan pacífico. Nan no ta bochinchero, i nan ta bai drumi trempan. Nan ta realmente bondadoso, onesto i nan ta comportá nan mes bon. Lo ta maraviyoso si tur hende tabata manera nan. Otronan ta horta tur cos—vas, asbak, asta papel di w.c. i sucu! Nunca cosnan asina a yega di pasa cu boso. Ora boso yunan ta coge ice cream for dje frishider anochi, mi no ta wori bai averiguá kico nan a coge. Nan ta calculá loke nan debé mi i ta bin paga mesora. Mi ta confia nan completamente. Ki maraviyoso lo ta si otro hendenan tabata asina! Mi ta deseá cu tur mi huéspednan tabata Testigo di Jehova.”

Testigonan di Jehova ta bon conocí na Italia, mescos cu den hopi otro parti dje tera. Nan ta ‘mantené nan conducta excelente entre e nacionnan’ i asina ta trece gloria n’e Dios berdadero, kende su nomber nan ta carga.—1 Pedro 2:12.