Ken Ta na Mando?

“KEN ta goberná e mundu?” Si un hende hací bo e pregunta ei, con lo bo contestá? Mayoria hende religioso lo bisa “Dios” of “Jesus.” Un artículo cu a aparecé den The Freeport News, un corant di Bahámas, a duna un contesta cu poco hende lo a spera.

“Mi a haña un tratado riba mi stupi,” e escritor dje artículo ta cuminsá. “Normalmente lo mi a ignorá un cos asina, pero e biaha aki mi a dicidí na les’é. E titular tabatin e pregunta, ‘Ken Realmente Ta Goberná e Mundu?’” Dor di lesa e tratado basá riba Bijbel, e señora aki a siña cu e gobernante dje mundu aki no ta ni Dios ni Jesus sino Satanas e Diabel.—Juan 12:31; 14:30; 16:11; 1 Juan 5:19.

“Considerá e excesonan cu sanger friu den crueldad monstruoso,” e tratado ta splica. “Hende a usa kambernan di gas, camponan di concentracion, lansadornan di vlam, bomnan di napalm i otro métodonan horibel pa torturá i mata un i otro sin misericordia. . . . Cua forsanan ta pusha hende na tal echonan repugnante of maniobrá nan den situacionnan caminda nan ta sinti nan obligá di cometé atrocidad? Bo a yega di puntra bo mes si un cierto poder malbado, invisibel ta influenciando hende pa cometé tal actonan di violencia?” Ta un sorpresa cu Bijbel ta yama Satanas “e dios dje sistema di cosnan aki”?—2 Corintionan 4:4.

Felismente, e tempu ta cerca ora Satanas i su demoñonan lo no existí mas. “Mundu ta pasa bai i tambe su deseo, pero esun cu ta haci e boluntad di Dios ta permanecé pa semper.” (1 Juan 2:17) Sí, Bijbel ta primintí cu esnan cu ta haci e boluntad di Dios lo tin e speransa di biba pa semper den un hustu mundu nobo. (Salmo 37:9-11; 2 Pedro 3:13; Revelacion 21:3, 4) Lo ta ki un alivio ora e influencia malbado di Satanas i su demoñonan ser eliminá!

Despues di resumí e contenido dje tratado chikitu aki, e escritor dje artículo den The Freeport News a concluí: “Mi ta realmente contentu cu mi a lesa e tratado ei . . . pasobra mi tambe tabata preocupá tocante e condicion dje mundu, i ken ta na mando.”