Otro Victoria pa Testigonan di Jehova na Grecia

DIA 6 di october, 1995, e Corte di Magistrado na Aténas, consistiendo di tres miembro, a trata un caso cu a enbolbé dos minister di tempu completo di Testigonan di Jehova. E acusacion tabata proselitismo, i e proceso a ser entamá dor di un funcionario policial despues cu e Testigonan a bishitá su cas.

E preguntanan cu e hues cu a presidí a haci, a mustra cu e tabata masha interesá den e obra di Testigonan di Jehova. Por ehempel, el a puntra: “Cuantu tempu caba boso ta haciendo e trabou aki? Con hende a bin ta trata boso den transcurso dje añanan? Ki clase di reaccion boso a haña riba boso trabou? Kico boso ta bisa hende na nan porta di cas?” Tur esnan presente den e sala di corte a scucha atentamente n’e excelente testimonio cu a ser duná.

Pa gran sorpresa dje Testigonan, asta e fiscal a papia na nan fabor. “Testigonan di Jehova tin e derecho constitucional pa no solamente kere den i adorá nan Dios,” el a remarcá den su discurso di conclusion, “sino tambe pa plama nan fe di cas pa cas, den plasa público i riba caya, asta distribuyendo nan literatura grátis si nan ta deseá esei.” E fiscal a cita vários decision di absolucion cu cortenan i e Conseho di Estado a emití. Tambe el a referí n’e caso di Kokkinakis versus Grecia, cua a ser dicidí na fabor di Testigonan di Jehova dor dje Corte Europeo di Derechonan Humano.a “Tuma nota, por fabor,” e fiscal a spierta, “cu Grecia asta a paga un but den e caso aki. P’esei nos mester ta masha cauteloso ora nos ser yamá pa husga casonan asina. De facto, pa cuminsá, e casonan aki nunca no mester a ser presentá den corte mes.”

Despues dje discurso dje fiscal, no a sobra mashá p’e abogado dje Testigonan bisa. No obstante, el a probechá dje oportunidad pa enfatisá cu e ley tocante proselitismo ta inconstitucional i cu el a bin ta brongosá Grecia riba un escala internacional.

E hues cu a presidí e caso simplemente a wak e dos otro huesnan, i e ruman homber i e ruman muher a ser absolvé unánimamente. E huicio, cu a dura un ora i dies minuut, tabata un victoria tantu p’e nomber di Jehova i pa su pueblo.

Esaki ta e di cuater absolucion cu a enbolbé casonan di proselitismo despues cu e Corte Europeo di Derechonan Humano a trata e caso di Kokkinakis. Testigonan di Jehova na Grecia ta alegrá cu problemanan en coneccion cu nan trabou di predicá prácticamente no ta existí mas awor i cu ta posibel pa continuá cu e trabou sin strobansa.

[Nota]