Ken Mester Culpa pa Guera?
MESTER culpa Dios p’e gueranan cu humanidad a bringa? “No, Dios no kier guera.” Asina Martin Niemöller, un clero aleman protestant bon conocí, a contestá e pregunta aki djis despues di e fin di Guera Mundial II. Su comentarionan a ser publicá na 1946 den un buki yamá Ach Gott vom Himmel sieh darein—Sechs Predigten (O Dios, Mira for di Shelu—Seis Sermon).a E buki ta declará:
“Ken cu kier culpa Dios pa [gueranan] no conocé, of no kier conocé, e Palabra di Dios. Naturalmente, ta un otro asuntu si nos como cristian ta carga un gran parti di culpa of no p’e gueranan incesante. I nos no por scapa for dje asuntu aki asina fácilmente. . . . Tambe nos por corda exactamente cu iglesianan cristian, atrabes di épocanan, bes tras bes a ofrecé nan servicionan boluntariamente pa bendicioná gueranan, trupanan i armanan i cu nan a haci oracion den un manera masha no-cristian p’e destruccion di nan enemigunan den guera. Tur esaki ta nos falta i e falta di nos antepasadonan, pero definitivamente no por culpa Dios. I nos como cristiannan awe ta para cu bergwensa dilanti un asina yamá secta manera e Studiantenan Sincero di Bijbel [Testigonan di Jehova], cu na cantidad di cientos i miles a drenta camponan di concentracion i [asta] a muri debí cu nan a rechasá servicio militar i a nenga di tira riba hende.”
Awe, rond di 50 aña despues di Guera Mundial II, Niemöller su palabranan ta duna amantenan di pas cos pa pensa ariba. No, no mester culpa Dios p’e dramamentu di sanger dje nacionnan! En berdad, mediante su adoradornan berdadero, cu no ta tuma parti den e conflictonan dje mundu, Dios ta declarando e fin inminente di tur guera.—Salmo 46:9; Juan 17:16.
[Nota]
a E sermonnan di Martin Niemöller a ser publicá mas despues na ingles den e buki Of Guilt and Hope (Tocante Culpa i Speransa). Sin embargo, e version ingles ta diferenciá for dje texto aleman original, p’esei e cita aki ta traducí directamente for di aleman.
[Rekonosementu pa Potrèt na página 32]
USAF photo