“Wel, Unda Boso Misa Ta?”

HOPI biaha hende ta haci e pregunta aki n’e Testigonan di Jehova na Mozambique. Francamente, te cu recientemente esei tabata un pregunta difícil pa contestá. Esaki ta pasobra Testigonan di Jehova no tabatin reconocimentu legal den e pais aki sino te 1991. P’esei, no tabata posibel pa tin lugánan di adoracion claramente identificabel i establecé.

Sin embargo, e situacion ei a cambia dia 19 di februari, 1994. Riba e dia calor ei, yen di solo, e dos promé Salonnan di Reino cu a yega di ser construí na Mozambique a ser dedicá. Un total di 602 persona a bini huntu n’e dedicacion dje excelente lugánan di reunion aki den e stad portuario di Beira, mas o ménos mitar caminda den e largura dje costa di Mozambique. Nan lo sirbi e necesidadnan dje tres congregacionnan den e stad ei.

Henter e proyecto, for di fundeshi te dak, a tuma un aña i dos luna di trabou duru. Hopi biaha 30 trahador boluntario of mas for dje pais bisiña Zimbabwe a bini i a traha lado a lado cu e Testigonan local. Siendo cu no ta nan tur por a ser acomodá den e cas di misionero na Beira, cu a sirbi como e base di operacion, algun a kampeer rond dje cas durante fin di siman i na algun ocasion pa simannan largu.

E sitio dje Salon di Reino p’e Congregacionnan Massamba i Munhava ta situá riba e caminda principal di Beira. “Riba un dia druk, ora trabou tabata cana rápidamente i e progreso tabata masha notabel,” un misionero a remarcá, “a hera di sosodé accidentenan di tráfico segun cu automobilistanan pasando tabata keda wak e Salon di Reino, casi lubidando riba nan stuurwiel.” Hopi a para pa observá e trabou, i nan tabata particularmente impresioná cu e presencia di hende di diferente rasa cu tabata traha huntu como un solo grupo.

Hopi planeamentu i organisacion tabata enbolbí den e trabou. Diferente for di hopi otro proyecto den e parti aki di mundu, unda material i recursonan ta scars, nunca e trabou riba e Salonnan di Reino a para pa falta di material. Na un ocasion, nan tabatin mester di 800 sacu di cement, i e único lugá cu por a entregu’é no tabatin e sacunan necesario pa yena e cement. E rumannan a tuma contacto cu e oficina di sucursal dje Sociedad Watch Tower n’e capital, Maputo; e sacunan a ser mandá cu avion, hibá n’e fábrica di cement i yená. E trabou a sigui sin interupcion.

Na un otro ocasion, ora nan tabata poniendo e spannan di dak, biga di staal a caba. Debí n’e scarcedad pisá, nan a importá biganan di staal pa e proyecto for di 600 kilometer leu! Un trahador a acercá un homber cu tabata observando i a puntr’é si e tabata sa unda nan por a haña e biganan di staal pa completá e trabou. E homber a contestá: “Mi ta pará aki pa mas cu un ora, i ta parce cu no tabata pa coincidencia. Mi no por keda sin admirá e trabou cu boso ta haciendo i e spiritu tras dje proyecto aki. Mi tin net e biganan di staal cu boso mester, i cu muchu gustu mi ta ofrecé nan na boso como regalo.” El a resultá di ta un percuracion masha oportuno.

Hopi observador a puntra nan mes ta cua compania grandi di construccion tabata tras dje proyecto. E trahadornan, naturalmente, tabata masha contentu pa bisa nan cu esakinan tabata Testigonan di Jehova cu a ofrecé nan servicio como boluntario. Kico specialmente a impresioná e observadornan? “Boso ta un pueblo uní,” un a bisa. “Aunke boso ta di diferente rasa, boso ta traha huntu manera ruman.” E resultado tabata cu hopi a bini pidiendo pa un studio di Bijbel. Tambe esaki tabatin un impacto grandi riba e reunionnan. E promedio di asistencia di Congregacion Manga, por ehempel, ta mas cu dobel e cantidad di Testigo.

E Salonnan di Reino nobo berdaderamente a resultá di ta un gran bendicion p’e Testigonan local. Mayoria a reuní anteriormente den lugánan primitivo cu un dak di yerba of algun plachi di zink riba nan cabes, patras den un curá of den un cuarto chikitu di un cas privá. Hopi biaha nan a muha ora awaceru tabata cai; tog nan a asistí n’e reunionnan fielmente. Pa décadanan esakinan tabata e único “Salonnan di Reino” cu e Testigonan na Mozambique a conocé. Ruman Caetano Gabriel, un anciano den Congregacion Massamba, a declará: “Nos ta gradicidu na nos rumannan rond mundu cu a contribuí pa e realisacion dje proyecto aki.” Un Testigo hóben a recordá: “Ora nos tabata na Carico (“camponan di reeducacion” unda Testigonan di Jehova a ser interná pa aproximadamente 12 aña), nos tabatin custumber di bisa, ‘Nos lo perseverá fielmente, i Jehova lo recompensá nos.’ E Salon di Reino nobo ta un recompensa di parti di Jehova.” Nan palabranan ta expresá nan profundo gratitud i nan determinacion pa alabá Jehova.

Hopi hóben cu a participá den e trabou di construccion a ser yená cu e spiritu di pionero i despues a cuminsá cu e ministerio di pionero regular. E hóben Isabel, un pionero regular den Congregacion Manga, a remarcá segun cu e tabata mira e Salon di Reino impecablemente limpi e dia promé cu su dedicacion: “Pa mi esaki ta e lugá di mas bunita den e stad di Beira. Ta e placer di mas grandi pa mi pa ta aki.” Adão Costa, un misionero, a splica cu e autoridadnan local a duna masha bon cooperacion permitiendo proceduranan special di importacion pasobra nan tabata conciente dje onestidad dje Testigonan. Anto el a agregá: “Aunke nos a cansa hopi, tabata un goso pa mira e frutanan di tur e trabou aki p’e onor i gloria di Jehova.”

Awor, ki ora cu un habitante amigabel dje stad di Beira puntra, “Wel, unda boso misa ta?” e Testigonan ta dirigié na un dje dos Salonnan di Reino nobo i ta respondé cu palabranan manera, “E ta riba e Caminda Internacional, Avenida Acordo de Lusaka, net enfrente di Warda di Polis Cuater Escuadron.” Anto, agregando un coreccion, “Solamente e no ta un misa, sino un Salon di Reino!”

[Mapa/Plachi na página 20]

(Pa e teksto den su formato kompleto, wak e publikashon)

AFRICA

Mozambique

Beira

Maputo

[Rekonosementu]

Mapa: Mountain High Maps® Copyright © 1995 Digital Wisdom, Inc.