Ken Lo Ta Evangelisadornan?

NA UN reunion dje Conseho Mundial di Iglesia rond di 40 aña pasá, e miembronan a ser urgí pa “cuminsá den un spiritu di evangelisá” i pa siña nan tounan pa “ocupá nan mes cu evangelisacion.” Cincu aña despues John A. O’Brien, un clero católico, a skirbi tocante e necesidad pa haña disipelnan nobo “dor di bai cerca nan” i no simplemente “dor di sinta den nos casnan.” I na januari 1994, Papa Juan Pablo II a bisa cu “no ta tempu pa tene bergwensa dje Evangelio, ta tempu pa predik’é for di riba dak.”

Aparentemente e yamadanan ocasional aki pa evangelisadornan a drenta i sali na otro banda di orea. Un artículo den e corant australiano Illawarra Mercury a declará: “Católiconan prominente na Costa Sur no tin masha gana di adoptá e método cu Testigonan di Jehova ta usa pa plama nan fe.” Un homber a bisa cu evangelisá simplemente “no ta parti dje mentalidad católico.” Un otro a razoná: “Ta bon pa e Iglesia promové su mes, pero no dor di bati na porta di hende. Tal bes lo ta mihó pa duna instruccion religioso via scol of manda mensahe via post.” Ni e decano di un catedral local no tabata masha sigur con pa interpretá e comentarionan dje papa. “Nos lo a animá e hendenan pa practicá e Evangelio cu nan conocé mediante nan propio bida,” el a bisa. “Mi no sa si esei ta nificá bati na porta di hende.” E titular dje artículo di noticia ta resumí e asuntu hopi bon: “Católiconan lo no haci caso dje yamada di Papa pa predicá.”

Apesar cu cristiandad a faya na evangelisá, mas cu cincu miyon Testigo di Jehova ta siguiendo e mandamentu di Jesus pa “bai . . . i haci disipel di hende di tur nacion.” (Mateo 28:19, 20; compará cu Echonan 5:42.) Nan predicacion di cas-pa-cas ta ser efectuá awor den mas cu 230 pais. E mensahe cu nan ta trece ta unu positivo, resaltando Bijbel su promesanan maraviyoso pa futuro. Pakico no papia cu nan e siguiente biaha cu nan bishitá bo?