‘Nan Ta Interesá den Yuda Otronan’
ESEI ta loke un polis di New York City a bisa di Testigonan di Jehova. E tabata papiando cu Kathleen, un dje boluntarionan di tempu completo cu ta sirbi n’e sede mundial di Testigonan di Jehova na Brooklyn, New York.
Durante su pausa di merdia, riba un dia calor i yen di solo den otoño, Kathleen tabata sintá riba un banki na un lugá di cana keiru cerca di Betel. E tabata scuchando un audiocaset player ekipá cu headphone. Na un lugá caminda helicopter ta baha na otro banda di East River, preparacionnan tabata tumando lugá p’e salida dje papa, kende tabata di bishita n’e stad. Tur caminda tabatin medidanan fuerte di siguridad, i un cantidad di polis tabata patruyando riba e lugá di cana keiru. Un di nan a acercá Kathleen i a puntr’é kico e tabata haciendo. Kathleen a contestá: “Mi ta scuchando un caset na idioma ruso. Bo sa, mi ta un Testigo di Jehova, i mi kier siña ruso pa mi por compartí e bon nobo dje Reino di Dios cu hende di abla ruso cu a bin biba den e stad aki.”
E polis a respondé cu mas i mas el a bin ta admirá Testigonan di Jehova durante su último 15 añanan como oficial di patruya den New York City. El a bisa: “Mi ta mira Testigonan di Jehova como un religion organisá di cua su miembronan ta sinceramente interesá den yuda otronan den e comunidad.”
Testigonan di Jehova ta conocí rond mundu p’e trabou di predicá di cas-pa-cas cu nan ta haci. (Echonan 20:20) Segun cu nan ta señalá n’e Reino di Dios como e único solucion p’e problemanan cu ta plaga humanidad, tambe nan ta yuda hende mehorá nan calidad di bida dor di animá nan pa aplicá principionan di Bijbel den nan bida diario. Por ehempel, e Testigonan ta urgi mayornan pa percurá un ambiente na cas cu ta duna yunan smak di siña. Nan ta exhortá individuonan pa ta onrado i obediente na ley, animando nan pa adkerí abilidadnan i cualidadnan cu un doño di trabou lo haña balioso.
Sí, Testigonan di Jehova ta masha interesá den yuda hende den e comunidad pa mehorá nan bida. Bo ta keda cordialmente invitá pa respondé n’e siguiente oferta.