“No Core cu Nan!”

“SI UN, of asta dos, Testigo di Jehova, primi bel di bo porta, no core cu nan!” Corriere della Sera ta consehá. E corant tabata refiriendo na un suceso cu a tuma lugá na Treviso, den nort di Italia, caminda un comerciante a risca di perde mas cu un miyon lira (mas cu 1.000 florin) debí cu el a core cu dos Testigo cu a bin bishit’é.

Segun e corant, dos Testigo a introducí nan mes n’e homber cu e palabranan: “Awe ta un bon dia pa bo. Nos ta Testigonan di Jehova, i nos tin algu balioso pa duná bo.” Cu esei, e comerciante hostil a dal e porta cera, sin permití nan di caba di papia.

Si e homber a para scucha, lo el a haña sa cu e Testigonan a bini su cas pa debolb’é su potmoni, cu nan a haña riba un banki den parke. Pues e Testigonan no por a haci nada mas cu hiba e potmoni cu su contenido n’e warda di polis mas cerca. E siguiente dia, polis a debolb’é na su doño legítimo.

“Si un otro hende tabata den sapatu dje dos [Testigonan] desafortuná ei,” segun Il Gazzettino di Treviso, “probablemente lo el a . . . keda cu e contenido bastante cuantioso dje potmoni. Pero no Testigonan di Jehova, kendenan mester ta absolutamente onrado.”

Kico ta impulsá Testigonan di Jehova pa ta “absolutamente onrado”? Esei ta nan amor pa Dios i pa próhimo, na armonia cu e siñansanan di Jesucristo. (Mateo 22:37-39) Esei tambe ta e motibu pakico Testigonan di Jehova ta bai di cas pa cas pa declará e bon nobo tocante e maraviyoso “mundu nobo” primintí dor di Jehova Dios. Un mensahe asina di speransa ta bal hopi mas cu cualkier posesion material!—2 Pedro 3:13.