Informe di Proclamadornan di Reino

Yudansa pa Esnan cu “Sed” na Rusia

“FELIS ta esnan cu tin hamber i sed pa husticia, pasobra nan lo ser saciá,” Jesus a bisa. (Mateo 5:6) E siguiente experencianan ta mustra con Testigonan di Jehova ta yudando pa satisfacé e sed spiritual di hopi hende na Rusia, caminda libertad religioso tabata restringí pa mas cu 70 aña.

▪ Un señora yamá Valentina tabatin preguntanan bíblico serio cu pa hopi aña e no por a haña contesta pa nan. Por ehempel, e tabata puntra su mes: ‘Na ken Jesus a haci oracion?’ El a razoná cu Jesus mester a haci oracion na un persona mas haltu cu e mes i Valentina tabata puntra su mes tocante e nomber dje Persona aki.

Valentina a bishitá e Iglesia Ortodox Ruso. Sin embargo, den e religion ei e no a haña contesta pa su preguntanan. Siendo cu e no a ser satisfacé, el a bai na un iglesia protestant pero atrobe no a haña contestanan cla. Sin sa unda mas pa bai, Valentina a cuminsá lesa Bijbel, purbando di haña e contestanan e mes—pero sin resultado. El a haci oracion pa yudansa.

Un poco tempu despues Testigonan di Jehova a bati na su porta. Nan a mustr’é for di Bijbel cu e nomber di Dios ta Jehova. Por fin, el a haña sa na ken Jesus a haci oracion! El a cuminsá studia Bijbel regularmente cu e Testigonan. Hopi bes el a keda lantá henter anochi lesando literatura publicá pa Sociedad Watch Tower i buscando textonan bíblico. Pronto Valentina a yega n’e conclusion cu el a haña e berdad. Den tres luna el a cuminsá participá den e trabou di predicá, i dos luna despues di esei, el a ser bautisá. Su búskeda piadoso pa haña e berdad a ser recompensá.

▪ Un Testigo a biaha cu bus pa bai predicá na un área remoto. Durante e biahe el a papia cu un muher hóben tocante e promesanan di Bijbel, pero e muher hóben no tabata interesá. Dos luna despues e Testigo a haci un segundo biahe na e mésun área pa duna un discurso público. Despues dje discurso el a acercá un bishitante i a puntr’é: “Un hende a papia cu bo caba tocante e bon nobo di Bijbel?” E homber a contestá, “Sí, abo a papia cu mi.” E Testigo a kere cu ta wega e tabata haciendo. Pero e homber hóben a splica cu dos luna promé el a tende e combersacion entre e Testigo i e muher hóben, durante e biahe den bus. “Mi kier a sa mas, pero bo a baha for dje bus, i mi a pensa cu nunca mas lo mi mira Testigonan di Jehova atrobe. Anto na mi trabou mi a topa un homber cu ta studiando Bijbel cu e Testigonan. I pues, atá mi aki!”

E homber i su esposa a cuminsá studia Bijbel. Despues di un tempu masha corticu, e por a mira cu su empleo tabata na conflicto cu principionan bíblico. Dor cu e kier a tene un bon concenshi dilanti Dios, el a cambia su trabou. Awor e ta contando otro hende tocante e Reino di Dios na tur oportunidad. Su esposa tambe ta progresando den su studio di Bijbel.

Testigonan di Jehova den e inmenso teritorio di Rusia ta contentu di por tin un participacion den bisa na tur hende sincero: “‘Bin!’ I laga ken cu tin sed bini; laga ken cu kier tuma e awa di bida grátis.”—Revelacion 22:17.