Baha cu Penshon—Un Porta Habrí na Actividad Teocrático?
BAHA cu penshon—pa hopi hende esei ta cera e porta di un periodo largu di cunsumí i di tin stres. Despues di tabata atrapá den un rutina monótono of agitá, hopi hende ta spera ansiosamente pa ora nan baha cu penshon esei habri un porta cu ta hiba na añanan di trankilidad i libertad personal. Sin embargo, hopi bes, e porta ei ta hiba na fastidio i curpa sin gracia. Recreo i hobinan simplemente no ta duna e sintimentu di balor propio cu trabou ta duna.
Pa Testigonan di Jehova, bahamentu cu penshon por habri “un porta grandi cu ta hiba na actividad.” (1 Corintionan 16:9) Aunke behes ta trece su problema i limitacionnan cuné, algun hende di mas edad a ripará cu, cu e yudansa di Jehova, nan por aumentá nan sirbishi na dje. Considerá e experencianan di algun cristian di mas edad na Hulanda. Durante e aña di sirbishi di 1995, 269 dje mas cu 1.223 pioneronan (proclamadornan di Reino di tempu completo) tabatin 50 aña di edad of mas. Di e 269 pioneronan aki, 81 tabatin 65 aña di edad of mas.
Algun por traha pionero simplemente dor di sigui cu e bida ocupá cu nan a establecé tempu nan tabatin trabou seglar. (Compará cu Filipensenan 3:16.) Un cristian penshoná yamá Karel ta corda: “Tempu mi tabata traha na mi trabou seglar, mi tabatin custumber di cuminsá traha 7:30 a.m. Ora mi a cuminsá ricibí mi penshon, mi a dicidí di sigui e mésun rutina. Mi ta cuminsá e dia haciendo testificacion riba caya dilanti dje stacion di trein tur mainta shet’or.”
Planeamentu cuidadoso tambe ta un clave pa éxito. (Proverbionan 21:5) Por ehempel, algun persona di mas edad a logra spar suficiente cen pa mantené nan mes den nan ministerio. Otronan a dicidí di reducí gastunan personal i busca trabou ‘part-time.’ Tuma Theodore i Ann. Nan a cuminsá bida casá como pionero te ora cu obligacionnan di famia a pone cu nan mester a stop di traha pionero. Pero nan spiritu di pionero a keda bibu! Segun cu nan yu muhernan a crece, e yunan constantemente a ser animá pa traha pionero. Mas importante, Theodore i Ann a pone un bon ehempel, sirbiendo hopi bes como pioneronan auxiliar. Segun cu e yu muhernan a bira mas grandi, Theodore i Ann a cuminsá reducí nan trabou seglar pa nan por tin mas tempu pa sirbishi di veld.
Despues cu nan yu muhernan a drenta den e ministerio di tempu completo i a bandoná cas, Ann a cuminsá traha pionero. Un dia el a animá Theodore pa kita for di trabou. “Nos tur dos por traha pionero,” el a sugerí. Theodore a informá su doño di trabou di su intencion. Pa su sorpresa su hefe a ofrecé pa yuda dor di dun’é trabou ‘part-time,’ bisando: “Mi ta suponé cu bo kier traha tempu completo pa bo hefe ei riba [den shelu].” Theodore i Ann awor ta disfrutando dje trabou di pionero huntu.
Algun persona a cuminsá traha pionero como reaccion riba circunstancianan cu a desaroyá den nan bida. E morto trágico di nan yu muher i nan nieta a pone un pareha di mas edad contemplá seriamente riba e manera cu nan tabata usando nan lastu añanan di bida. (Eclesiástes 7:2) En bes di ser aplastá dor di tristesa, nan a cuminsá den e sirbishi di tempu completo, locual nan ta disfrutando di dje awor pa mas cu ocho aña!
Nos tin cu admití cu berdadero determinacion ta necesario pa keda den e ministerio di tempu completo. Por ehempel, Ernst i su esposa, Riek, a cuminsá traha pionero asina cu nan yunan a bandoná cas. Djis despues di esei un ex-socio di negoshi a ofrecé Ernst un trabou lucrativo. Ernst a contestá: “Nos tin e mihó doño di trabou cu nunca, i nos no ta dispuesto pa kita for di su trabou!” Debí cu Ernst i su esposa a permanecé den e “empleo” di Jehova, otro privilegionan di sirbishi a habri pa nan. Nan a sirbi den e trabou di circuito pa mas cu 20 aña i ta sigui como pionero te cu awe. Ta duel nan di a sigui un curso di sacrificio propio? Algun tempu pasá e pareha a skirbi: “Si ta Jehova su boluntad, aki tres luna nos ta spera di celebrá nos 50 aña casá, cu hopi biaha ta ser yamá e boda di oro. Pero cu pleno conviccion nos ta bisa cu nos berdadero añanan di oro a cuminsá ora nos a cuminsá traha pionero.”
Hopi hende ta haña cu e porta cu ta hiba na mas actividad tambe ta hiba na mas goso! Un ruman homber cu a cuminsá traha pionero dos siman despues cu el a haci 65 aña di edad ta bisa: “Mi tin cu bisa cu nunca mi a experenciá un periodo den mi bida asina ricamente yená cu bendicion manera e último dies añanan di traha pionero.” Un pareha casá cu a traha pionero pa mas cu shete aña ta bisa: “Kico otro un pareha di nos edad i cu nos circunstancia lo mester ta haciendo? Hopi bes nos ta mira hende manera nos den e teritorio—cómodamente na cas, djis birando gordo, bieu i stijf. E sirbishi ta mantené nos den bon condicion mentalmente i físicamente. Semper nos ta huntu. Nos ta hari hopi i ta disfrutá di bida.”
Naturalmente, no ta tur esnan di mas edad tin circunstancianan cu ta permití nan traha pionero. E cristiannan aki por ta sigur cu Jehova ta apreciá loke sea ta posibel pa nan haci den su sirbishi. (Compará cu Marco 12:41-44.) Por ehempel, un ruman muher físicamente incapacitá ta hañ’é ta biba den un cas di cuido. Sin embargo, ainda tin un porta di actividad habrí p’e! Un dokter a puntr’é con e ta logra pasa su tempu. E ruman muher ta conta: “Mi a bis’é cu nunca mi tin suficiente tempu. E no por a comprendé esaki. Mi a bis’é cu esaki ta pasobra mi dianan ta yená cu actividadnan satisfaciente. Mi no ta solitario, pero mi ta busca otro hende cu sí ta solitario i ta purba di conta nan loke Dios tin wardá pa humanidad.” E ruman muher ta resumí e asuntu bisando: “Pa un hende cu tin casi 80 aña, bo no por spera muchu hopi. Haci oracion pa mi di manera cu mi por sigui hiba hopi hende na Jehova.”
Abo tin edad di baha cu penshon? E porta cu ta hiba na ménos actividad por ta masha tentador, pero e no ta e porta cu ta hiba na bendicion spiritual. Pensa riba bo circunstancianan huntu cu oracion. Por ta cu bo por pasa dor dje porta cu ta hiba na mayor actividad den e sirbishi di Jehova.
[Plachi na página 25]
Bahamentu cu penshon por hiba na mas actividad den e ministerio