Unda Nan Ta Haña Nan Fortalesa?

SI BO mira e barbulete riba e potret aki di cerca, lo bo mira cu un di su cuater alanan ta completamente inútil. Tog, e barbulete ta sigui tuma alimento i bula. Esaki no ta un caso único. Hende a mira barbulete den nan actividad diario faltando 70 porciento dje superficie di nan ala.

Di igual manera, hopi hende ta desplegá un determinacion firme. Apesar di sufrimentu causá pa problema físico of emocional severo, nan no ta entregá.—Compará cu 2 Corintionan 4:16.

Apostel Pablo personalmente a wanta hopi dificultad den transcurso di su biahenan como misionero. El a ser sutá, batí, piedrá i encarcelá. Ademas, e tabata sufri di un sorto di hendikep, tal bes un problema cu su wowonan, cu tabata un constante “sumpiña den carni” p’e.—2 Corintionan 12:7-9; Galationan 4:15.

Un anciano cristian yamá David, cu a lucha cu atakenan severo di depresion pa vários aña, ta kere cu e fortalesa di Jehova tabata crucial pa su recuperacion. “Hopi biaha, progreso cu mi a traha duru p’e a parce di desvanecé,” e ta splica. “Confrontá cu desanimacion asina, mi a dependé totalmente riba Jehova, i e berdaderamente a sostené mi. Tabatin ocasionnan cu mi tabata haci oracion pa hopi ora largu. Ora mi a papia cu Jehova, mi sintimentunan di soledad i inutilidad a desparcé. Mi a lucha dor di periodonan di gran debilidad, pero danki na Jehova, for dje debilidad aki a sali fortalesa—asta e fortalesa pa yuda otronan.”

Jehova Dios a fortalecé Pablo. P’esei, e por a bisa: “Ora mi ta débil, e ora ei mi ta poderoso.” (2 Corintionan 12:10) Sí, Pablo su debilidad a siñ’é confia riba e fortalesa cu Dios ta duna. “Pa tur cos mi tin e forsa den birtud di esun cu ta impartí poder na mi,” e apostel a bisa. (Filipensenan 4:13) Jehova siguramente ta duna poder na su sirbidornan.