Informe di Proclamadornan di Reino

E Poder Transformador dje Palabra di Dios

SEGUN loke e mes a admití, e tabata “un blasfemador i un persiguidor i un homber insolente.” (1 Timoteo 1:13) Pero el a cambia! E transformacion di apostel Pablo tabata asina grandi cu mas despues e por a declará: “Bira imitadornan di mi, mescos cu ami ta di Cristo.”—1 Corintionan 11:1.

Awe, cientos di miles di adoradornan sincero na tur parti di mundu ta haciendo cambionan similar. Kico ta permití nan haci asina? Nan ta ganando e conocimentu dje Palabra di Dios i ta aplicand’e den nan bida. E siguiente experencia ta resaltá e poder transformador dje Palabra di Dios.

Na Slovenia un pareha di edad tabata biba nan so pafó di un pueblo. E esposo, Jože, tabatin rond di 60 aña di edad i tabatin un problema serio cu alcoholismo. Tog, el a percurá pa su esposa enfermo, Ljudmila. Un dia dos proclamador di Reino a acercá Jože. El a invitá e Testigonan pa drenta su cas, unda nan a topa su esposa. Ora Ljudmila a tende e mensahe di Reino, lágrimanan di goso a basha for di su wowo. Jože tambe a gusta loke el a tende i a haci hopi pregunta. Despues cu nan a laga algun literatura bíblico cu e pareha, e Testigonan a bai.

Un luna despues e Testigonan tabata por a bolbe bek, i nan a ripará e buki Bo por biba pa semper den Paradijs riba tera poné riba e mesa. Ora nan a puntra Jože unda el a hañ’é, el a bisa: “Mi a mira un anuncio riba e último página di un dje revistanan cu boso a laga cu mi. Di manera cu mi a skirbi boso oficina na Zagreb i a pidi e buki.” En bista di su interes, el a ser invitá pa asistí n’e binidero Memorial dje morto di Cristo cu mester a ser tené n’e Salon di Reino. P’e goso dje Testigonan, el a presentá!

Pronto, nan a cuminsá un studio di Bijbel, i nan a progresá bon. Por ehempel, ora e Testigonan a mustra Jože for di Bijbel cu “bo no mester traha pa bo mes un imágen grabá of . . . buig dilanti nan ni ser inducí pa sirbi nan,” mesora el a recogé tur e imágennan religioso cu tabatin den e cas, incluyendo prenchinan, i a tira nan afó.—Exodo 20:4, 5.

Jože su sed pa berdad spiritual tabata ser satisfacé. Sin embargo, desafortunadamente ainda e tabatin un otro sed. Pa rond di 18 aña, el a bebe rond di 10 liter di biña tur dia. Debí na su problema cu bebementu, e no tabata presta masha atencion na su aparencia personal. Pero despues cu el a siña e punto di bista di Dios dje maluso di alcohol, e tabata determiná pa cambia.

Gradualmente el a haci esfuerso pa vence su problema cu bebementu, teniendo un registro di cuantu e tabata bebe riba un base diario. Pronto e no tabata sclabisá mas na biña. Den transcurso di su studio di Bijbel, el a siña tambe cu cristiannan berdadero mester tin bon higiena personal. P’esei, el duna e Testigonan placa i a bisa: “Wel, bai i cumpra ki paña i sapatu cu mi mester pa ta representabel na reunionnan cristian i den sirbishi di veld!” E Testigonan a regresá cu paña djabou, mea, sapatu, camisa, flus, dashi i un tas.

Despues di a studia Bijbel pa un aña, Jože i Ljudmila a cualificá pa compañá e Testigonan den e trabou di predicacion di cas-pa-cas. Tres luna despues nan a simbolisá nan dedicacion na Dios pa medio di bautismo bou di awa na un congreso di districto di Testigonan di Jehova. Apesar di behes i mal salú, Jože a participá regularmente den predicacion dje bon nobo i mas despues, te na su morto na mei 1995, a sirbi fielmente como sirbidor ministerial den e congregacion. E fruta positivo cu a ser producí den bida dje homber humilde aki i su esposa ta duna prueba dje poder transformador dje Palabra di Dios!