Fe A Impuls’e pa Actua

ORA Jehova a comisioná Moises pa dirigí e nacion di Israel for di sclabitud egipcio, Moises na promé instante a hala tras, bisando: “Dispensá mi, Jehova, pero mi no ta un persona cu ta papia vlot, ni desde ayera ni desde promé cu esei ni desde cu bo a papia cu bo sirbidor, pasobra mi ta lento di boca i lento di lenga.” (Exodo 4:10) Sí, Moises no a sinti su mes cualificá pa un asignacion asina serio.

Di igual manera awe, hopi sirbidor di Jehova tin biaha ta sinti nan mes inadecuá pa cumpli cu e tareanan cu nan a ser asigná. Por ehempel, un superintendente cristian yamá Theodore ta conta: “Di tur e cosnan cu Jehova ta pidí mi haci, e ministerio di veld ta esun mas duru. Tempu mi tabata yong, mi tabata cana bai n’e porta rápidamente, haci manera mi ta primi e bel di porta i cana bai ketu asina, sperando cu ningun hende lo a tendé mi of mirá mi. Segun mi a crece, mi a stop di haci esei, pero e idea di bai di cas pa cas a hací mi físicamente malu. Te cu awe ainda, mi ta bira malu promé cu mi sali den sirbishi, pero mi ta bai di tur manera.”

Kico ta loke a haci posibel pa Moises i Testigonan di tempu moderno manera Theodore enfrentá cu éxito e temornan ei? Bijbel ta contestá: “Pa medio di fe [Moises] a bandoná Egipto, . . . pasobra el a sigui firme como si fuera mirando Esun cu ta invisibel.”—Hebreonan 11:27.

En berdad, dor di ehercé fe den Jehova, Moises por a superá su sintimentunan di ta inadecuá i cumpli cu su tareanan asigná como hues, profeta, lider nacional, mediador dje pacto di Ley, comandante, historiador i escritor bíblico.

Di igual manera, ora nos tin fe manera Moises, nos lo cana como si fuera ‘mirando Esun invisibel.’ Tal fe ta inspirá curashi, capacitando nos pa carga nos responsabilidadnan cristian—asta ora nos tal bes ta sinti nos inadecuá.