Sostené dor di Nan Amigu di Mas Importante

TIN un amistad cu specialmente ta sostené Testigonan di Jehova. Esei ta nan relacion precioso cu nan Amigu di mas importante, Jehova Dios. (Compará cu Santiago 2:23.) E ta apoyá nan durante pruebanan grandi di fe.

E Testigonan su registro di integridad bou di régimennan totalitario a ser elogiá dor di hopi observador. Un di nan ta Jiří Krupička, un doctor den filosofia i ciencia natural cu a emigrá for di Checoslovakia na 1968 despues di a pasa hopi aña den camponan di concentracion comunista. Den su buki Renesance rozumu (Renacementu di Intelecto), e ta comentá riba e sufrimentu i e firmesa di Testigonan cu a ser encarcelá pa nan neutralidad.

Bou di e gobiernu comunista, hopi Testigo a ser sentenciá na castigu di prizon pa motibu di nan fe. Aunke encarcelá, nan a nenga di traha den mina di uranio pa propósitonan di guera. (Isaías 2:4) Krupička ta describí un esena cu el a presenciá na un dje minanan na 1952. El a mira dos figura pará manera estatua di ijs den e weer severo di winter. Barínan di metal a tapa nan cabes i parti ariba di curpa.

Krupička ta skirbi: “Nan tabata pará eifó den pañanan tur kibrá di prizon for di mainta trempan. Con nan por a soportá pa para asina largu riba pianan di vries? Mediante poder di fe. E barínan tabata bieu i frusá. Un persona cruel a pusha nan riba nan cabes i scouder cu asina forsa cu e rand skerpi dje barí a pasa dor di e jacket i corta un di nan su cueru, i sanger tabata lek for di su manga.

“E guardia a para nos fila dilanti nan, i e comandante a duna nos un discurso breve. Nenga di traha, el a bisa, ta rebelion i por lo tantu ta ser castigá. Ningun co’i kens sentimental tocante guera i matamentu lo yuda esakinan cu ta oponé guera pa motibu di concenshi, e enemigunan aki di socialismo.”

E comandante a coge un bara di heru i a dal un dje barínan. E homber den dje a cai abou cu e barí tapando su cabes ainda. Loke a sosodé despues ta profundamente grabá den Krupička su memoria.

E ta declará: “Cantamentu tabata bini for di den e barínan. Zonidonan suave, un oracion den bos abou na Dios, cu por tende cualkier cos for di cualkier lugá—asta un esfuerso pa canta for di paden di barínan bieu i frusá di uranio. Dios ta tend’é mas mihó cu un cantamentu di koor den un catedral grandi.”

Dia 1 di september, 1993, e trabou di Testigonan di Jehova den e República Checo oficialmente a ricibí reconocimentu legal. E Testigonan checo ta alegrá awor pa efectuá nan trabou cristian educacional den libertad. Sí, nan ta contentu di por conta otro hende tocante Jehova, nan Amigu di mas importante.

[Plachi na página 7]

Esnan presente n’e congreso n’e República Checo