Laga Boso Lus Briya!

POR fin e tempu a yega p’e homber di edad mira e Mesías primintí! Mediante revelacion divino Simeon tabata sa cu “lo e no a mira morto promé cu el a mira e Cristo di Jehova.” (Lucas 2:26) Pero tabata ki un emocion ora Simeon a drenta e tempel i Maria i Josef a pone e baby Jesus den su brasanan! El a duna alabansa na Dios, bisando: “Awor, Soberano Señor, bo ta laga bo esclabo bai liber na pas . . . pasobra mi wowonan a mira bo medio di salba . . . un lus pa kita e velo for dje nacionnan i un gloria di bo pueblo Israel.”—Lucas 2:27-32; compará cu Isaías 42:1-6.

Jesus, for di su bautismo n’e edad di 30 te cu su morto, a resultá di ta un “lus” p’e mundu. Den ki manera? El a emití lus spiritual dor di predicá tocante e Reino di Dios i Su propósitonan. Tambe el a desenmascará siñansa religioso falsu i a identificá claramente e obranan cu ta pertenecé na scuridad. (Mateo 15:3-9; Galationan 5:19-21) P’esei, Jesus por a bisa corectamente: “Mi ta e lus di mundu.”—Juan 8:12.

Jesus a muri na aña 33 E.C. E lus a paga e ora ei? Di ningun manera! Miéntras e tabata ainda riba tera, Jesus a bisa su disipelnan: “Laga boso lus briya dilanti hende.” (Mateo 5:16) Di mes manera, despues di Jesus su morto, su siguidornan a sigui laga e lus briya.

Den imitacion di Jesus, awe cristiannan ta reflehá e lus di Jehova dor di participá den e trabou di predicacion. Nan “ta cana manera yunan di lus,” demostrando cu nan mes ta ehempelnan iluminador den e bida cristian.—Efesionan 5:8.