Informe di Proclamadornan di Reino

Ex-Enemigunan Uní den Sirbishi na Jehova

“E PROME biaha cu mi a yega di tende algu tocante Testigonan di Jehova tabata ora mi tabata sirbi como guardia armá na Bosnia,” Branko ta splica.a

Branko tabata na warda na un hospital caminda a trata esnan heridá. Un dje dokternan tabata studia Bijbel cu e Testigonan, i durante un warda djanochi, el a splica Branko hopi di loke el a siña tocante Bijbel.

Loke Branko a tende e anochi ei a conmov’é asina tantu cu el a pone su armanan abou mesora. El a drenta den contacto cu e Testigonan, cu deseo pa siña mas. Algun tempu despues, despues di a muda pa un otro pais europeo, Branko a busca un Salon di Reino i asistí na un reunion dje congregacion yugoslavo di Testigonan di Jehova. Ei ta caminda Branko a topa Slobodan.

Slobodan tambe a bini for di Bosnia i tabata sirbi como boluntario den e mésun guera cu Branko—pero pa e contra-partida. Slobodan a bringa pa e serbionan contra e croatanan. P’e tempu cu nan dos a topa, Slobodan a bira un Testigo bautisá di Jehova. El a ofrecé pa studia Bijbel cu Branko, su ex-enemigu. Segun cu e studio a progreá, Branko a siña mas tocante Jehova, i su amor pa Dios a crece. Esaki a impulsá Branko pa dedicá su bida n’e Creador. Na october 1993 el a simbolisá su dedicacion mediante bautismo bou di awa.

Con Slobodan a bira Testigo di Jehova? El a bandoná e zona di guera na Bosnia algun tempu anterior. El a lesa algun publicacion dje Testigonan, pero tabata te ora cu dos Testigo a yama na su cas na cuminsamentu di 1992 cu su interes den e Palabra di Dios a crece. Ken a yama na cas di Slobodan i ofrecé pa studia Bijbel cuné? Esei tabata Mujo, kende tambe a bini for di Bosnia pero kende a ser criá como moslim. Segun cu e studio di Bijbel a progresá, Mujo i Slobodan, un tempu enemigu di otro, a pasa algun tempu huntu tur dia pa fortalecé otro su fe.

E guera na ex-Yugoslavia a cobra bida di cientos di miles di hende. Pero Branko, Slobodan i Mujo awor ta sirbi como predicadornan dje bon nobo di tempu completo den e mésun congregacion di Testigonan di Jehova. Nan a vence conflicto étnico i racial, i awor nan ta busca pas miéntras nan ta someté nan mes n’e Creador, Jehova.

Pero kico a ocasioná cambionan asina? Esei tabata nan amor pa Jehova, nan respet pa Bijbel i nan deseo ferviente pa aplicá e berdad di Bijbel den nan bida. Manera e Scritura Santu ta bisa, “e palabra di Dios ta bibu i ta ehercé poder . . . i ta capas pa dicerní pensamentu i intencionnan di curason.”—Hebreonan 4:12

[Nota]