E Berdad dje Evangelio

TRES fragmento masha chikitu di un manuscrito dje Evangelio di Mateo, conocí como P⁶⁴, tabata den posesion dje Colegio Magdalen na Oxford, Inglatera, desde 1901. Pa algun tempu, escolásticonan a kere cu nan ta data for dje fin di siglo dos E.C.

Recientemente, Carsten P. Thiede, un experto den papirologia na Paderborn, Alemania, a haci un examinacion cabal di P⁶⁴, locual ta consistí di porcionnan di 10 versículo for di Mateo capítulo 26. E resultado? Skirbiendo den e Zeitschrift für Papyrologie und Epigraphik (Periódico di Papirologia i Epigrafia), Thiede ta describí e fragmentonan di Oxford como “un fragmento di un código cristian dje promé siglo, probablemente (aunke no necesariamente) datando promé cu aña 70 A.D.”

E observacionnan di Thiede a causa hopi consternacion den prensa i den e círculo di escolásticonan. Di con? Pasobra loke generalmente ta ser aceptá como e porcion di texto dje Evangelionan mas bieu na existencia ta P⁵², un fragmento dje Evangelio di Juan cu ta di rond di aña 125 E.C., of no mas promé cu siglo dos.

Lo mester warda pa wak si e fecha nobo duná na e fragmentonan di papiro P⁶⁴ lo haña amplio aceptacion of no. Di tur manera, e fecha mas trempan lo no solamente haci P⁶⁴ e fragmentonan di Evangelio mas bieu na existencia; lo e duna tambe mas evidencia cu ta indicá cu e Evangelio di Mateo en berdad a ser skirbí den e promé siglo, posiblemente asta promé cu aña 70 E.C., ora cu numeroso testigo ocular dje sucesonan dje bida di Jesus ainda tabata na bida pa confirmá e berdad dje Evangelio.

[Rekonosementu pa Potrèt na página 32]

Cu permiso dje Presidente i Asociadonan dje Colegio Magdalen, Oxford.