Bo A Ser Salba?

Johnny tabatin dies aña di edad ora un homber a par’é na un feria i a puntra:”Yoncuman, bo ta aceptá Jesucristo como bo Señor i Salbador?” Esei a parce Johnny un pregunta poco straño, ya cu semper el a kere den Jesus. P’esei el a contestá,”Naturalmente cu sí.” “Alabá Señor!” e homber a grita pa tur hende tende. “Un otro alma salbá pa Cristo!”

Salbacion realmente ta asina simpel? Johnny a ser “salbá” desde e momento cu el a bisa e palabranan ei, sin importá kico lo el a haci pa e resto di su bida? Hopi hende sincero lo contestá cu sí. Algun tratado religioso ta bisa pa skirbi e fecha cu bo a ser “salbá” pa asina bo por cord’é.

Un clero a skirbi cu na “e momento cu bo expresá un simpel fe den Cristo[acepta Cristo superficialmente] ... bo destino ta establecé permanentemente.” El a pretendé cu Bijbel ta bisa cu salbacion ta dependé di un solo “acto di fe, no riba e continuidad di fe.” Un otro escritor religioso a skirbi: “E [solo acto di fe] aki ta un obra finalisá. [Salbacion] a ser lográ caba pa bo... Bo ’guera a terminá.’ Bo ’picá a ser eliminá.’”Pero asta hende cu ta firmemente convencí cu e salbacion aki mediante un solo acto di fe ta cierto, por mira un problema aki. Ta claro cu hopi hende cu a ser bisá cu nan ta “salbá” no ta biba e manera cu Bijbel ta bisa nan mester biba. Un splicacion comun ta cu kisas nan no “a aceptá” Cristo realmente.

Pues, kico “aceptá” Jesus realmente kier men? Esei ta un solo acto di fe of e ta un moda di biba continuo? Nos creencia mester ta suficiente fuerte pa motivá nos na accion? Realmente nos por aceptá e beneficionan di Jesus su sacrificio sin e responsabilidad di siguié?

Hopi hende kier e bendicionnan pero no e responsabilidad di sigui i obedecé Jesus. En realidad, e palabra “obedecé” hopi bes ta molestiá nan. Sin embargo Jesus a bisa: “Bin sea mi siguidor.” (Lucas 18:18-23) I Bijbel ta declará: “Esnan cu no ta obedecé e bon nobo tocante nos Señor Jesus... lo sufri e castigu hudicial di destruccion eterno.”-2 Tesalonicensenan 1:8, 9; Mateo 10:38; 16:24.

Bijbel ta bisa hopi cos cu ta lanta dudanan serio en cuanto loke a ser siñá tocante salbacion. Si bo lo kier verificá loke Bijbel realmente ta bisa di e tópico aki, lo bo haña e siguiente páginanan di ta particularmente interesante. Habri bo Bijbel i lesa e textonan citá pa wak loke Jesus i su apostelnan a siña tocante e asuntu vital aki.