Decision den Caso Contra Testigonan di Jehova

DESPUES di hopi posponementu, e Corte di Apelacion na Tesalónica, Grecia, finalmente a reuní dia 8 di juni, 1995, pa tende e caso contra cuater Testigo di Jehova femenino. E acusacion contra nan? Proselitismo [busca hende pa combertí], cu ley di Grecia a prohibí pa mas cu cincu década.

Sin embargo, pa ora cu e corte a bini huntu, e testigo principal dje fiscal—e pastor cu a instigá e caso contra e cuater muhernan—no tabata na bida mas. Un otro pastor a purba testificá na su lugá, pero e corte no a aceptá su peticion. Pues, no ta sorprendente cu e audiencia a dura solamente 15 minuut! E hues a examiná e otro testigonan di banda di fiscal i no a haña e acusadonan culpabel di a practicá proselitismo ilegal. E decision aki ta indicá cu corte griego ta dispuesto pa respetá i pega n’e decision na cua e Corte Europeo di Derechonan Humano a yega na 1993.

Tabata specialmente sorprendente pa mira e tres muhernan cu a testificá p’e banda di fiscal acercá e Testigonan acusá, felicitando nan di henter curason. “Nos ta pidi disculpa pa tur loke a sosodé,” un di nan a bisa. El a agregá: “No tabata nos falta. E pastor a forsa nos pa acusá boso. Awor cu e no ta na bida mas, nos kier pa boso bishitá nos pueblo i nos casnan.”

Asina, Jehova un biaha mas a otorgá un victoria maraviyoso pa su pueblo na Grecia. Leynan contra proselitismo a ser pasá na Grecia na 1938 i 1939. Na 1993 e Corte Europeo di Derechonan Humano a husga cu ta incorecto pa usa e ley aki pa persiguí Testigonan di Jehova.—Mira E Toren di Vigilancia, di 1 di september, 1993, página 27-31.