Bo Ta Corda?

Bo a examiná e reciente edicionnan di E Toren di Vigilancia cuidadosamente? Lo bo haña ta interesante pa recordá lo siguiente:

◻ Con un persona ta ‘bini cerca Jesus’ na armonia cu su invitacion na Mateo 11:28?

Jesus a bisa: “Si un hende kier bini tras di mi, lagu’e nenga su mes i tuma su staca di tormento i siguí mi continuamente.” (Mateo 16:24) Pues, bini cerca Jesus ta implicá someté bo mes boluntad na esun di Dios i di Cristo, aceptando un cierto carga di responsabilidad, haciendo esei continuamente.—15/8, página 17.

◻ Pakico ta solamente un “poco” ta haña e ‘caminda pertá cu ta hiba na bida’ cu Jesus a mencioná na Mateo 7:13, 14?

E caminda smal ta ser restringí dor dje leynan i principionan di Dios. P’esei, lo e atraé solamente un persona cu sinceramente ta deseá di conformá su bida na e normanan di Dios. Aunke e ta parce restrictivo, e ‘caminda pertá’ ta libra un persona den tur aspecto importante. Su límitenan ta ser poné dor di “e ley perfecto cu ta pertenecé na libertad.” (Santiago 1:25)—1/9, página 5.

◻ Con dicernimentu por ser cultivá?

Dicernimentu no ta bini fácilmente of di mes. Pero cu pacenshi, oracion, esfuerso sincero, asociacion sabí, estudio i meditacion riba Bijbel i dependencia riba e spiritu santu di Jehova, dicernimentu por ser cultivá.—1/9, página 21.

◻ Con yaluzí humano por sirbi un bon propósito?

E por impulsá un persona pa protehá un hende kerí for di mal influencia. Ademas, hende apropiadamente por mustra yaluzí pa Jehova i su adoracion. (1 Reynan 19:10)—15/9, página 8, 9.

◻ Kico ta nificá e expresion na Génesis 50:23 relacioná cu e bisanietunan di Josef: “Nan a nace riba Josef su rudianan”?

Esaki por nificá simplemente cu Josef a reconocé e muchanan como su desendiente. E por indicá tambe cu na un manera cariñoso el a hunga cu e muchanan, yayando nan riba su rudianan. Tatanan awe ta haci bon di demostrá nan yunan cariño similar.—15/9, página 21.

◻ Kico ta vitalmente importante pa un matrimonio i bida di famia exitoso?

Pa alcansá tal resultadonan deseabel, partnernan matrimonial semper mester pone e boluntad di Dios na promé lugá. Haciendo esei, parehanan ta purba keda huntu i resolvé nan problemanan aplicando e conseho dje Palabra di Dios. Asina nan ta evitá tur sorto di dolor di curason cu ta resultá ora Dios su boluntad ta ser ignorá. (Salmo 19:7-11)—1/10, página 11.

◻ Con crucial un sentido piadoso di urgencia ta awe?

Un sentido piadoso di urgencia ta un parti integral di sirbishi di henter alma na Jehova. E ta protehá contra i ta yuda stroba e intentonan dje Diabel pa causa cu e sirbidornan di Dios ta “bira cansá i perde ánimo.” (Hebreonan 12:3) E ta protehá nan for di enbolbimentu innecesario cu e mundu i su materialismo, teniendo nan mente riba e cosnan djariba—”e berdadero bida.” (1 Timoteo 6:19)—1/10, página 28.

◻ Den e comparacion di carné i cabritu, ki ora Jesus ta sinta riba su trono i pakico? (Mateo 25:31-33)

E comparacion no ta mustr’é sintando den e sentido di bira Rey. Mas bien, e ta sinta como Hues. E husgamentu ei no ta algu cu ta extendé over di un periodo di hopi aña. En bes di esei, e comparacion ta señalá n’e futuro ora Jesus den un tempu limitá lo pronunciá i ehecutá huicio riba e nacionnan.—15/10, página 22, 23.

◻ Kico ta e “generacion” na cua Jesus a referí asina frecuentemente?

Jesus a aplicá e término “e generacion aki” n’e masanan contemporáneo cu nan “guianan ciegu” kendenan a forma e nacion hudiu. (Mateo 11:16; 15:14; 24:34)—1/11. página 14.

◻ Den e cumplimentu final di Jesus su profecia na Mateo 24:34-39, na kico e expresion “e generacion aki” ta referí?

Jesus aparentemente ta referí n’e pueblonan riba tera cu ta mira e señal di Cristo su presencia pero cu no ta drecha nan camindanan.—1/11, página 19, 31.

◻ Con e areglo di stadnan di refugio i nan restriccionnan a beneficiá e pueblo di Israel di antigwedad?

El a impresioná riba e israelitanan cu nan no mester tabata descuidá of indiferente pa cu bida humano. Tambe el a enfatisá e necesidad pa mustra misericordia ora ta apropiado pa haci asina. (Santiago 2:13)—15/11, página 14.

◻ Kico ta e stad di refugio antitípico?

Esaki ta e percuracion di Dios pa protehá nos for di morto como consecuencia di violacion di su mandamentu tocante e santidad di sanger. (Génesis 9:6)—15/11, página 17.

◻ Con e hermandad cristian por yuda nos “recobrá poder”? (Isaías 40:31)

Entre nos rumannan cristian, tin algun cu por ta enfrentando presion i pruebanan similar i cu por ta experenciando sintimentunan hopi parecido na esnan di nos. (1 Pedro 5:9) Ta un consuelo i fortalecedor di fe pa sa cu loke nos ta pasando aden no ta algu straño i cu nos sintimentunan no ta fuera di lo comun.—1/12, página 15, 16.