“No Bira Uní Bou di un Yugo Desigual”

E DOS toronan ilustrá aki tin forsa enorme, capacitando nan pa hala carga pisá cu facilidad. Pero suponé cu un dje toronan a ser reemplasá cu un buricu. Siendo cu un buricu ta mas chikitu i mas débil cu un toro, probablemente lo e rebelá dor di skop e baranan di coneccion cu ta ten’é den e yugo desigual aki. Cu bon motibu, anto, e ley di Dios na Israel a declará: “Bo no mester ploeg cu un toro i un buricu huntu.”—Deuteronomio 22:10.

Apostel Pablo a skirbi algu similar relacioná cu hende. El a bisa: “No bira uní bou di un yugo desigual cu incrédulonan.” (2 Corintionan 6:14) Esaki mester ser tené na mente specialmente ora di scoge un partner matrimonial. Matrimonio ta un asociacion permanente, pasobra Jesucristo a bisa: “Loke Dios a uni huntu no laga ningun hende separá.” (Mateo 19:6) Hopi dolor di curason ta resultá ora un pareha casá no ta compartí e mésun creencia religioso, principio i metanan. P’esei ta solamente razonabel pa sigui e spiertamentu bíblico pa casa “solamente den Señor.” (1 Corintionan 7:39) Drentando matrimonio cu un persona cu no ta compartí bo fe religioso lo presentá un problema asta mas grandi cu pone un toro i un buricu bou dje mésun yugo.

Diferencia den creencia religioso ta solamente un factor cu por causa cu un pareha ta uní bou di un yugo desigual. Partnernan prospectivo—asta dje mésun fe—lo haci bon pa puntra, ‘Nos ta compartí e mésun metanan? Unda nos lo biba? Ken lo atendé cu e presupuesto? Nos tur dos lo traha? Kico di yunan? Bondad i consideracion lo goberná e relacion matrimonial?’

Te na un cierto grado, e manera den cua asuntunan asina ta ser considerá por indicá si un yugo lo ta igual of desigual. Naturalmente, no tin dos persona cu ta completamente compatibel. Sin embargo, por lo general, si durante enamoracion e pareha por enfrentá i resolvé problemanan huntu i si nan por tene e liñanan di comunicacion habrí, ta probabel cu nan lo no ta uní bou di un yugo desigual.