Testigonan di Jehova Rond Mundu—Nueva Zelandia

ISLANAN por alabá Jehova? Sí, segun Isaías 42:10: “Canta na Jehova un cantica nobo, su alabansa for dje extremidad dje tera, . . . islanan i boso cu ta habitá nan.” E islanan cu ta forma Nueva Zelandia siguramente ta alabá Jehova. Renombrá mundialmente pa lagonan, bahianan, cerunan haltísimo, gletsjernan, playanan, selvanan tropical dorná cu varen, i paisahenan berde idílico, Nueva Zelandia ta papia elocuentemente dje mahestad i eminencia dje Creador di cielu i tera.

For di djis despues di comienso dje siglo aki, mas i mas habitante di Nueva Zelandia a uni nan bos pa alabá Jehova dor di acudí na dje den adoracion puru i compartí e bon nobo dje Reino di Dios cu otronan. Recientemente, un Testigo kende a tende un bon experencia tocante dunamentu di testimonio na parientenan a dicidí na purba cu su famia. El a regalá copianan dje buki Bo por biba pa semper den Paradijs riba tera na vários miembro di famia. E resultadonan te asina leu? E ta informá cu un ruman muher i un ruman homber ta studiando Bijbel awor, un subrino a ser bautisá como Testigo di Jehova, i otronan awor ta mas receptivo p’e berdad dje Palabra di Dios. Ainda e tin un teritorio grandi pa traha cuné; ademas di su mayornan, e tin seis ruman homber i nuebe ruman muher!

Alabansa na Jehova tambe ta bini como resultado ora e Testigonan uni forsa pa construí Salonnan di Reino. Por ehempel, e columnista di corant Roy Perkins a skirbi den e Opotiki News di dia 17 di mei, 1994: “Siendo un no-creyente, mi a keda masha impresioná p’e trabounan i esfuerso di tur e trahadornan dedicá cu ta hinca asina tantu tempu i esfuerso den e proyecto p’e amor di nan Dios.

“Den tur e oranan di trabou aki efectuá den e fin di siman mi nunca a mira of tende di ni sikiera un disputa di sindicato . . . Hende muher tabata riba stelashi trahando banda dje hombernan, yenando material entre e blokinan, hisando i transportando materialnan di construccion, tur den un esfera relahá i contentu.

“I ni un minuut perdí miéntras cualkier un a tuma un pausa pa lora un cigaria. Pa tur e hendenan ei trahando den cualkier capacidad e aire tabata liber di polucion cu excepcion di algun holor di verf i stof di bloki.”

E cuerpo di anciano dje Congregacion di Opotiki a skirbi: “Henter e proyecto a haci un gran impresion riba e hendenan dje pueblo. Ta parce manera tur hende ta papiando di dje. A cuminsá vários studio di Bijbel. Un en particular cu nos ta haña masha emocionante ta di un pareha profundamente religioso kende pa hopi aña a pidi nos pa no yama na nan cas. Nan a bini n’e sitio di construccion tur dia i despues n’e reunion. E esposo a bisa despues, ‘Mi por mira cu boso ta e pueblo di Dios. Di paden, henter mi bida mi a anhelá pa asociá cu un pueblo manera esaki.’ ”

E aña anterior, un columnista di Otago Daily Times a bisa lo siguiente tocante un Salon di Reino construí rápidamente na Dunedin: “E tabata un hazaña remarcabel, un ehempel remarcabel di motivacion i di con pa yuda bo mes.” E mésun corant a comentá: “Hende dje stad a wak cu admiracion segun cu un edificio grandi a ser construí dilanti nan bista, i hopi hende mester ta reflehando ki otro transformacionnan i proyectonan positivo por ser lográ si un consorcio igualmente grandi di labor boluntario i un gran spiritu di cooperacion tabata disponibel. Salon di Reino ta un símbolo orguyoso di esfuerso constructivo cu ta logra resultado.”

Di e hopi cientos di hende cu a bishitá e sitio di construccion, un cabayero a observá cu e Testigonan tabata construyendo “iglesianan” miéntras cu su denominacion religioso tabata bendiendo nan pa motibu di membresia menguante. “Si boso a warda rond di diesdos luna mas, boso lo por a cumpra un di nos iglesianan,” el a risca bisa. “Nos tin cu bende unu pasobra nos no por keda bij cu e pagonan. Pero, naturalmente, boso no tin clero cu ta ricibí salario. . . . I ademas e gastunan di mantencion di boso edificionan ta abou, no edificionan haltu cu toren skerpi cu ta imposibel pa mantené.”

Claramente, islanan en berdad por alabá Dios. Cu Jehova su alabansanan sigui resoná riba e bunita pais aki den Laman Pacífico—i rond mundu!

[Kuadro na página 9]

DETAYENAN DJE PAIS:

Aña di Sirbishi di 1994

MAXIMO CANTIDAD DI PUBLICADOR: 12.867

PROPORCION: 1 Testigo pa 271

ASISTENCIA NA MEMORIAL: 24.436

PROMEDIO DI PUBLICADOR PIONERO: 1.386

PROMEDIO DI STUDIO DI BIJBEL: 7.519

CANTIDAD BAUTISA: 568

CANTIDAD DI CONGREGACION: 158

OFICINA DI SUCURSAL: MANUREWA

[Plachi na página 9]

Pioneronan bayendo teritorio rond di 1930

[Plachi na página 9]

Edificionan di Sucursal na Manurewa

[Plachi na página 9]

Predicando e mensahe di Reino na Devonport, Auckland