‘Mescos cu heru ta haci heru skerpi’

PA FIN di siglo tres E.C., un homber hóben sincero yamá Anthony, describí como un “cristian di iglesia cóptico,” a retirá for dje mundu i a dedicá 20 aña isolá den desierto. Pakico? El a sinti cu esaki tabata e mihó manera p’e sirbi Dios. E tabata cristiandad su promé ermitaño of ‘kluizenaar’ cu influencia.

Awe, cristiandad tin poco ermitaño. Pero mas i mas individuo ta busca isolacion den un otro manera. Nan ta nenga di papia cu otronan tocante religion, sintiendo cu e papiamentu ei ta hiba na desacuerdo i pelea. Nan adoracion ta consistí principalmente di no haci daño na nan próhimo.

Ta cierto cu evitá di haci daño na bo próhimo ta un parti di religion berdadero, pero mas ta necesario. Un proverbio antiguo ta declará: “Cu heru, heru mes ta ser hací skerpi. Asina un homber ta haci e cara di un otro skerpi.” (Proverbionan 27:17) Echo ta cu Bijbel ta animá cristiannan pa reuní huntu, no pa isolá nan mes completamente for dje mundu of for di otro cristiannan. (Juan 17:14, 15) E ta bisa: “Laga nos considerá un e otro pa incitá otro na amor i na obranan excelente, sin bandoná nos reunimentu huntu.” (Hebreonan 10:24, 25) Testigonan di Jehova ta sigui e conseho ei. Vários biaha pa siman, nan ta reuní huntu pa ‘haci e cara di otro skerpi,’ edificando e fe di compañeronan creyente. Nan ta haña cu considerando e Bijbel onestamente no ta hiba na pelea. Mas bien, e ta hiba na armonia i pas. E ta un parti vital di adoracion berdadero.