Nan A Hacié pa Amor
UN FIEL biuda hospitalario na Cánada tabata lantando cuater yu muher yong como cristian berdadero. E ancianonan den e congregacion a tuma nota cu su cas tabata den necesidad di reparacionnan extenso. E no tabatin ni e placa ni e abilidad pa haci e trabou e mes. Pues na armonia cu e principio describí na 1 Timoteo 5:9, 10, e ancianonan discretamente a haci areglo p’e trabou ser hací p’e. Con?
Plannan a ser trahá p’e biuda i su yunan bai for di cas pa cincu dia. Mas cu 80 persona den e congregacion a duna nan apoyo di henter alma, haciendo donacion di material, fondo i tempu. Manera e famia a bai, trahadornan ansioso a basha bin n’e cas mescos cu abeha. Nan a drecha henter e parti exterior dje cas. Nan a pleister i ferf e murayanan. Nan a schuur e flur i hacié fini. Nan a pone mosaico i tapijt nobo. Nan a drecha tur kabel di coriente i stopcontact cu tabatin mester di reparacion. Asta meubelnan gastá a ser reemplasá. Un renobacion completo a ser lográ den cincu dia so!
E atmósfera di entusiasmo i actividad a causa un bon impresion den e becindario. Un bisiña di 80 aña di edad tabata asina conmoví dor di e esfuersonan dje Testigonan cu el a trece su kwashi i a insistí pa yuda. E doño di trabou di un dje boluntarionan a contribuí cu un capa di ventilacion p’e stoof di cushina. Un otro doño di trabou a haci donacion di kashi di cushina nobo. Un homber tabata asina impresioná cu e kier a siña mas tocante Testigonan di Jehova. Ansiosamente el a aceptá e publicacion Bo por biba pa semper den Paradijs riba tera.
Ora e biuda i su yu muhernan a regresá cas nan caranan a reflehá claramente un sorpresa total. Tabatin un abundancia di lágrima, harimentu i abraso—un momento inolvidabel di amor cristian i emocion. En berdad, amor i interes genuino den miembronan dje congregacion den necesidad ta un marca di berdadero cristianismo, pasobra Pablo a skirbi: “Realmente, anto, miéntras cu nos tin tempu faborabel p’e, laga nos obra loke ta bon pa cu tur, pero specialmente pa cu esnan relacioná cu nos den e fe.”—Galationan 6:10.