Transfusion di Sanger Ta Ser Reconsiderá

DEN e era tristu aki di AIDS, e mayor menasa pa e salú di un pashent na hospital por ta scondí den e sala di operacion. “No tin ningun manera pa nos haci e suministro di sanger completamente steril,” segun Dr. Richard Spence, kende pa mas cu un década a dirigí e Centro pa Cirugia Sin Sanger na e Centro Médico di Cooper Hospital-University na Camden, New Jersey, Merca.

Pues no ta un sorpresa cu e centro médico ta trata hopi Testigo di Jehova, kende nan nengamentu di transfusion di sanger basá riba Bijbel ta bon-conocí. (Levítico 17:11; Echonan 15:28, 29) Sin embargo, un cantidad di pashent cu no ta Testigo tambe ta presentando n’e centro médico pa tratamentu, preocupá tocante e potencial peligernan di transfusion di sanger, cu ta incluí contraé hepatítis, AIDS i otro malesanan. “E surgimentu di AIDS a demostrá e necesidad pa examinacion di sanger,” e Courier-Post Weekly Report on Science and Medicine ta remarcá. “Pero algun caso tog por pasa sin ser detectá dor dje proceso di examinacion di sanger debí cu un persona por a ser contagiá cu e vírus promé cu e lo a ser detectá dor di un test.”

Debí na tal peligernan, e Centro pa Cirugia Sin Sanger ta usa alternativanan pa transfusion di sanger, incluyendo bolbe hinca e pashent su mes sanger den su curpa—un técnica cu algun Testigo por haña cu no ta malu bou di cierto circunstancianan.a Un otro tratamentu ta enbolbé e uso di remedinan cu ta stimulá e pashent su produccion di sanger. Ademas, un substituto di sanger sintético ta ser usá de bes en cuando pa duna un empuhe na e entrega di oxígeno sin tin mester di transfusion di sanger. “Testigonan di Jehova kier e mihó cuido médico,” segun Dr. Spence, “pero nan kier alternativanan pa transfusion.”

Testigonan di Jehova ta gradicidu pa e cooperacion i yudansa cu nan a ricibí for di dokternan cu ta respetá nan conviccionnan religioso. Como resultado, nan en berdad a ricibí “e mihó cuido médico” i a mantené un concenshi limpi dilanti Jehova Dios.—2 Timoteo 1:3.

[Notanan]