Kico e Spiel Ta Revelá?

WAK den un spiel. Kico bo ta mira? Tin biaha, un bistaso den un spiel ta revelá den bo aparencia un defecto embarasoso cu bo ta contentu pa corigí promé cu otro hende ripar’é.

Bijbel ta mescos cu un spiel. E por yuda nos haña un punto di bista onesto di nos mes, locual lo prevení nos di pensa muchu hopi—of muchu tiki—di nos balor den bista di Dios. (Mateo 10:29-31; Romanonan 12:3) Adicionalmente, Bijbel por revelá defectonan den nos palabranan, obranan of actitudnan cu nos mester corigí. Ora esaki sosodé, lo bo ignorá loke e spiel ta revelá?

E escritor bíblico Santiago ta bisa: “Si un hende ta un tendedor dje palabra, i no un hacidor, esaki ta manera un homber cu ta wak su cara natural den un spiel. Pasobra e ta wak su mes, i ta bai i ta lubidá unbes ki sorto di homber e ta.”—Santiago 1:23, 24.

Na contraste, Santiago ta describí un otro homber, unu “cu ta loer den e ley perfecto cu ta pertenecé na libertad i cu ta persistí den dje.” (Santiago 1:25) E palabra griego traducí como “loer” ta nificá sak abou na banda of buig dilanti pa mira. “E nificacion di loer ta enbolbé mas cu simplemente un bistaso superficial,” e Theological Dictionary of the New Testament ta bisa. E palabra ta implicá un búskeda cuidadoso pa un obheto scondí. “Tin algu importante cu esun cu ta wak ta deseá di mira, aunke e por ta difícil p’e mir’é i capta su nificacion mesora,” e comentarista di Bijbel, R. V. G. Tasker ta skirbi.

Lo bo scudriñá bo mes asina den e spiel dje Palabra di Dios i despues ahustá bo mes na loke e ta rekerí? Santiago ta continuá: “E homber aki, debí cu el a bira, no un tendedor lubidador, sino un hacidor dje trabou, lo ta felis den hacimentu di dje.”—Santiago 1:25.