Monedanan Cu Ta Carga E Nomber Di Dios

WAK e monedanan di plata cu ta ser mustrá aki cuidadosamente. Nan a ser trahá dor di e monarca aleman Wilhelm V durante su reinado di 1627 pa 1637. N’e tempu ei, Europa central tabata den e gara dje Guera di Trinta Aña, un bataya entre católico i protestant. Wilhelm V a tuma parti pa e causa dje protestantnan. Pa cubri e gastu enorme dje conflicto, el a reuní tur su plata i a traha moneda for di dje.

Interesantemente, e representacionnan riba hopi dje monedanan ta mustra e solo rondonando e nomber di Dios, Jehova, den e forma dje Tetragrámaton hebreo. Tambe tin un palu di palma, cu ta indicá fortalesa. E implicacion ta cu e palu, aunke e ta ser doblá dor di bientu, ta permanecé intacto bou dje proteccion di Dios. E inscripcion na latin riba e moneda ta contené e nomber di Jehova i ta expresá confiansa den su cuido protectivo.”

En bes di suplicá Dios su proteccion, tal uso dje nomber di Dios tabata berdaderamente en bano, pasobra Jehova no ta tuma parti den conflictonan violento di humanidad. En berdad, e Guera di Trinta Aña no por a ricibí e aprobacion di Dios. “Segun cálculonan conservativo,” Funk & Wagnalls New Encyclopedia ta bisa, “no ménos cu mitar dje pueblo aleman a perecé durante e guera. Un cantidad incontabel di stad, pueblo, pueblito i cunucu aleman a ser destruí totalmente. Aproximadamente dos tercer parti di Alemania su facilidadnan industrial, comercial i di agricultura tabata den ruina.”

E uso dje nomber Jehova riba e monedanan aki ta haci nos corda e mandamentu duná na Israel: “Bo no mag tuma e nomber di Jehova bo Dios den un manera indigno.” (Exodo 20:7) No obstante, e monedanan aki ta duna testimonio cu e nomber divino, Jehova, pa hopi tempu ta conocí p’e pueblo na Alemania. Con bon abo conocé e Dios cu ta carga e nomber ei?