“Bendiendo Salu” den Mozambique

FRANCISCO COANA, un miembro dje comité di pais di Mozambique, a pasa dies aña den “camponan di reeducacion.” E ta conta su experencia: “Mi tabata sa cu nos lo keda aki pa basta tempu, pues mi a puntra e superintendente di circuito si mi por a sigui como un pionero regular. Pero el a puntra con lo mi por dedicá suficiente tempu n’e ministerio público, ya cu casi tur hende den e camponan tabata un Testigo di Jehova. Mi a bisa cu lo mi bai na Milange, un pueblo 47 km leu, pa haña hende pa predicá na dje.

“Aunke oficialmente nos no tabata permití pa sali for dje camponan, e reglamentu aki no tabata ser poní na vigor estrictamente. Mi por corda cu mi a bai den e matanan, hinca rudia i pidi den oracion pa un manera pa predicá n’e hendenan local. Pronto Jehova a contestá.

“Mi a tuma contacto cu un homber cu tabatin un bicicleta i a cera un acuerdo cuné. El a bai di acuerdo cu si mi cultivá tres-cuart hectar di tereno promé cu e temporada di yobida yega, lo e pagá mi dunando mi su bicicleta. Pues mi a dedicá tur mainta cultivando su cunucu. Jehova a bendicioná e acuerdo aki, ya cu finalmente mi a obtené mi bicicleta.

“E resultado tabata cu mi por a yega n’e pueblo grandi di Milange i sigui cu mi trabou di pionero eficasmente den e teritorio fructífero aki. Ya cu nos obra tabata prohibí, mi mester a inventá un plan pa introducí hende n’e berdad. Cu buki i revistanan hincá bou di mi camisa, mi a hiba un poco salu den un sacu i a cuminsá bende salu. En bes di bend’é pa 5 meticais [moneda di Mozambique], mi a pidi 15 meticais. (Si mi a bend’é muchu barata, hende lo cumpra tur, i lo mi no tabatin mas salu pa bende pa mi predicacion!) Mi combersacionnan tabata bai mas of ménos asina aki:

“‘Bon dia! Awe mi ta bende salu.’

“‘Pa cuantu?’

“‘Dies cincu meticais.’

“‘No, no. Esei ta demasiado caru!’

“‘Si, mi ta di acuerdo cu e ta caru. Pero si bo ta haña cu e ta caru awor, djis warda un poco pasobra lo e bira hopi mas caru den futuro. Bo tabata sa cu esaki a ser profetisá den Bijbel?’

“‘Nunca mi a lesa esei den mi Bijbel.’

“‘Sí, e ta ei den. Trece bo Bijbel, lagá mi mustrá bo.’

“Cu esei lo surgi un combersacion usando su Bijbel, di manera cu esun di mi lo keda hincá bou di mi camisa. Mi tabata referí na Revelacion capítulo 6, tocante e condicionnan crítico i scarcedad di cuminda. Si mi a percibí un reaccion positivo, mi tabata saca afó E berdad cu ta hiba na bida eterna of Good News to Make You Happy i cuminsá un studio bíblico formal.

“E resultado tabata cu mi por a cuminsá un grupo di 15 persona interesá na Milange. Pero pronto autoridadnan a haña sa di nos actividadnan. Un dia miéntras mi tabata conduciendo un studio bíblico, polis a drenta di ripiente i a arestá nos. Nos tur, incluyendo e muchanan chikitu dje famia, a ser hibá n’e prizon local. Despues di a pasa un luna ei, nos tur a ser mandá bek n’e campo.”

E experencianan aki no a mengua e celo di nos rumannan. Al contrario, Francisco i su famia, huntu cu miles di nan rumannan cu tabata den e camponan, awor ta adorá i ta predicá den libertad na Mozambique.