Religion​—⁠Un Topico Prohibi?

“TIN dos tópico cu ami nunca ta discutí: religion i política!” Esei ta un contesta cu Testigonan di Jehova ta haña frecuentemente ora nan ta papia cu otronan tocante Bijbel. I ta di comprendé cu algun hende tin e punto di bista ei.

Ora hende ta debatí en cuanto política, por surgi rabiamentu intenso i pleitamentu. Hopi hende ta distinguí promesanan bashí claramente i ta realisá cu políticonan hopi bes ta busca solamente poder, fama i placa. Lamentablemente, diferencianan político tin biaha ta hiba na violencia.

‘Pero,’ kisas bo ta razoná, ‘mescos no ta cierto di religion? No ta asina cu fervor religioso a incitá hopi conflicto actual?’ Den Nort Irlanda, católiconan romano i protestantnan pa hopi tempu a ser poní como rivalnan contra otro. Den e Estadonan Bálkan, miembronan dje Iglesia Oriental Ortodox, católiconan romano i otronan ta bringa pa teritorio. E resultado? Atrocidadnan i sintimentunan di enemistad persistente.

Enfrentá cu e menasa di morto, hopi ta purba sconde nan creencianan personal i esnan di nan famia. Na Africa, siglonan di hostilidad religioso entre hendenan di cristiandad i partidarionan di otro religionnan stranhero i tambe étnico a impulsá mayornan pa duna nan yunan dos nomber cu a percurá un grado di proteccion, un custumber cu te ainda ta existí awe. Dje manera ei, un mucha homber por pasa sea como un miembro di iglesia of como profesando un otro religion dor di usa sea esun nomber of e otro. Ora un persona su creencianan religioso por cost’é su bida, no ta nada straño cu e ta vacilá pa papia tocante religion abiertamente.

Pa otronan, religion ta un tópico prohibí asta ora nan bida no ta na peliger. Nan ta teme cu papiando en cuanto nan creencianan cu un persona di otro religion lo hiba na discusionnan sin sentido. I otronan ta kere cu tur religion ta bon. Nan ta bisa cu tanten cu loke un persona ta kere ta satisfac’é, papiando en cuanto e diferencianan ta un esfuerso inútil.

Asta studiantenan serio dje materia di religion tin desacuerdo entre nan mes. Den su artículo “E Studio i Clasificacion di Religionnan,” The New Encyclopædia Britannica ta reconocé: “Rara bes . . . tabatin unanimidad entre escolásticonan en cuanto e materia di [religion] . . . Pues, atrabes di su historia, e tópico a contené elementonan di controversia.”

Un diccionario ta definí religion como “e expresion di hende su creencia den i reverencia na un poder sobrehumano reconocí como e creador i gobernante dje universo.” Esaki lo nificá cu religion ta hunga un papel importante den bida. En berdad, religion tabata un factor universal den duna forma n’e historia humano. “No tabatin ningun comunidad,” e Oxford Illustrated Encyclopedia of Peoples and Cultures ta remarcá, “cu no a trata na duna ordu i nificacion na bida mediante un of otro forma di religion.” Siendo cu religion ta encerá asuntunan asina fundamental manera “ordu” i “nificacion” na bida, siguramente e ta merecé algu mas cu discusion of debate. Mas bien, e ta merecé un intercambio di opinion—esta, un consideracion profundo—cu un otro persona. Pero cu ken i ki bon por resultá for di esei?