Con Precioso Bida Ta pa Bo?

UN MUCHA homber tiener a muri dor di a bula for dje di ocho piso di un edificio di apartamento. El a lesa un buki cu a describí un salto di suicidio como algu cu ta “liber di dolor of incomodidad of miedu; mas bien, e ta dushi.” E autor dje buki aki, publicá na Hapon, a pretendé cu e solamente tabata ofreciendo “suicidio como un dje opcionnan di bida.”

Personanan cu ta cometé suicidio no ta e úniconan cu ta manifestá menosprecio pa bida awe. Shofernan descabeyá tambe ta mustra masha tiki respet pa bida. Algun asta ta bebe i stuur, aumentando e posibilidad di un accidente fatal.

Otronan ta mustra con poco balor nan ta duna nan bida dor dje énfasis cu nan ta pone riba placer. Humadornan ta nenga di stop di huma, aunke humamentu por causa morto i a ser yamá un suicidio lento pero sigur. En bes di mantené puresa den e mundu aki obsesioná cu sex, hopi ta sigui tras di un curso inmoral cu hopi biaha ta hiba na morto.

Sin cu nan ni sikiera ta conciente di dje, algun ta horta nan mes di añanan di bida dor di come i bebe di mas, insuficiente ehercisio i buscamentu di placer. E autor hapones Shinya Nishimaru a spierta: “Custumbernan di come sin restriccion ta agitá funcionnan fisiológico, i e búskeda di nada mas sino cumbinencia i placer ta gasta hende su vitalidad.” Algun hende ta compartí e punto di bista di esnan di tempu antiguo cu a bisa: “Laga tin comementu i bebementu, pasobra mañan nos lo muri.”​—⁠Isaías 22:13; 1 Corintio 15:⁠32.

Sí, menosprecio pa bida ta comun awe. P’esei, ta apropiado pa puntra, Con precioso bida ta pa bo? Mester preservá bida a todo costo? I tin cualkier cos mas balioso cu nos bida actual?