Fe Yen di Curashi di Nos Rumannan na Ruanda

NA CUMINSAMENTU di 1994 e mundu a keda pasmá segun cu informenan di masacrenan na gran escala tabata bini for dje pais africano, Ruanda. Un guera civil brutal a cuminsá​—⁠e culminacion di siglonan di enemistad.

Enfrentá cu e colapso total di ley i ordu, e 2.000 i picu Testigonan di Jehova na Ruanda tabata obligá pa hui pa nan bida. Rond di 1.300 a haña refugio i proteccion den campamentunan di refugiado n’e paisnan den cercania, Zaire i Tanzania, pero algun no tabata capas pa hui na tempu. Cu tristesa nos ta informá cu rond di 400 di nos rumannan, homber i muher​—⁠tantu adulto como mucha, nan tur siendo civilnan naturalmente​—⁠a perecé den e violencia insensato. Cristiannan rond mundu ta lamentá e pérdida dje wardadornan di integridad yen di curashi aki i ta haña consuelo den e promesa bíblico di un resureccion.​—⁠Juan 11:25.

Con ta bayendo cu e rumannan ruandes cu a sobrebibí? Ancianonan a ser despachá for di un cantidad di pais pa investigá asuntunan djacerca. Un informe a bisa cu e rumannan ruandes a enfrentá e situacion “cu hopi dignidad i ánimo.” Por ehempel, un dje promé cosnan cu e rumannan a pidi p’e tabata literatura bíblico. ‘Nan ta parce mas preocupá pa ricibí alimento spiritual cu yudansa material, aunke nan ta den necesidad urgente di hopi cos,’ e informe ta concluí. I aunke e condicionnan den e campamentunan ta primitivo, ‘e parti mas limpi ta caminda nos rumannan ta biba.’

E Watch Tower Society a percurá fondo pa cumpra cuminda, laken, paña, sapatu i remedi. Nos rumannan na Francia a contribuí generosamente, i na cuminsamentu di juni, casi dos ton di provision a ser mandá pa nos rumannan ruandes den necesidad.

No ta un sorpresa cu e circunstancianan aki a resultá den un excelente testimonio. Observadornan a keda conmoví p’e echo cu nos rumannan ruandes a ricibí tal yudansa i sosten for di co-Testigonan, i cu esei a haci posibel pa compartí e yudansa aki cu otronan. Algun a comentá cu e Testigonan ta e úniconan den e campamentunan cu a ser bishitá dor di miembronan di nan mes religion!

E situacion difícil di nos rumannan ruandes ta recordá nos cu den e “último dianan” aki, hende lo ta “feros” i “violento.” (2 Timoteo 3:​1-5; Today’s English Version) I aunke Jehova no ta primintí su pueblo proteccion milagroso for di peliger físico, sí e ta primintí di protehá nan spiritualidad i relacion cuné i, durante e gobiernu di Mileño di Cristo, di resucitá esnan cu perecé awor. (Salmo 91:​1-10) Laga nos sigui resa pidi Jehova na fabor di nos rumannan ruandes cu a sobrebibí, p’e sostené i yuda nan durante e tempu di prueba aki.​—⁠Salmo 46:⁠1.