Pregunta Di Lector

Ta correcto pa acepta vacuna of otro inyeccion médico cu ta contene albumina deribá for di sanger humano?

Francamente, cada hende cristian mester tuma decision personal tocante esei.

Sirbidor di Dios ta deseá hustamente pa obedece e mandamento hayá den Echo 15:​28, 29, di abstene di sanger. P’sei, hende cristian no ta come carni cu no a sangra ni producto tal como sanger yená. Pero e ley di Dios també ta aplica den sector médico. Testigo di Jehova tin den nan poder un documento cu ta declara cu nan ta nenga ‘transfusion di sanger, sanger completo, cel corrá, cel blancu, plaqueta, of plasma di sanger.’ Pero, kico di inyeccion di serum of suero cu ta contene un tiki proteína di sanger?

Pa hopi tempo Testigo di Jehova tabatin e comprendimento di cu esei ta un asunto di decision privá di acuerdo cu e concenshi entrená bíblicamente di cada persona. Esei tabata indicá den “Pregunta di lector” den The Watchtower di 1 di Juni di 1990, cu a considera inyeccion di serum cu dócter por recomenda si bo ta den peliger di cierto maleza. Componente activo di tal inyeccion no ta plasma mes di sanger sino ta anticuerpo di plasma di sanger di hende of animal cu a desaroya un resistencia na tal maleza. Algun hende cristian cu ta kere cu nan por acepta cu un bon concenshi tal inyeccion a ripara cu anticuerpo di sanger di un mama na estado ta pasa e placenta i ta drenta den e sanger dje yiu den nan matriz. “Pregunta di lector” a menciona esei, i també e echo di cu algun albumina ta pasa for di mama na estado i ta drenta den su yiu.

Hopi hende ta haya cu esei ta importante, siendo cu algun vacuna cu no ta ser prepará for di sanger por contene un cantidad relativamente chikito di albumina di plasma cu tabata usá of agregá pa stabiliza ingrediente dje preparacion. Actualmente un tiki albumina ta ser usá també den inyeccion dje hormón sintético EPO (erythropoietin). Algun Testigo di Jehova a acepta inyeccion di EPO pasobra e por acelera produccion di cel corrá i asina por aliviá e dócter di kere cu transfusion di sanger por ta necesario.

Otro preparacion médico por yega di ser usá den futuro cu ta encerra un cantidad relativamente chikito di albumina, siendo cu compañía farmacéutica ta desaroya producto nobo of ta cambia fórmula di producto na existencia caba. P’sei, hende cristian por deseá di considera si albumina ta parti di un vacuna of otro inyeccion cu dócter ta recomenda. Si nan tin duda of tin motibo pa kere cu albumina ta un componente, nan por puntra e dócter.

Segun lo anterior, hopi Testigo di Jehova no ta contra aceptacion di inyeccion cu ta contene un tiki albumina. Sin embargo, ken cu kier studia e asunto mas cabalmente promé cu nan ta tuma un decision personal mester repasa e informacion presentá den “Pregunta di lector” di The Watchtower di 1 di Juni di 1990.