“Rais Cu No Por Ser Remové”

ENTRE e cosnan bibiente di mas grandi i mas bieu di mundu tin e palunan di secoya di California. E maraviyanan haltísimo aki tin un haltura di rond di 90 meter ora nan alcansá madures i por biba mas cu 3.000 aña.

Aunke e bista di un pal’i secoya ta asombroso, su organismo di rais cu bo no ta mira ta igualmente impresionante. Pal’i secoya tin un tapijt plat di raisnan trocí den otro cu por cubri un área grandi di 1,2 pa 1,6 hectar. E organismo di rais inmenso aki ta ancra e palu di un manera sólido asta ora tin diluvio of hopi bientu. Ta asta posibel pa un palu di secoya soportá un temblor poderoso!

Rey Sálomon a scoge e organismo di rais fuerte di un palu como símbolo den un di su proverbionan. “Ningun homber por establecé su mes mediante maldad,” el a bisa, “pero bon hende tin rais cu no por ser remové.” (Proverbio 12:​3, The New English Bible) Sí, e malbadonan ta pará riba suela instabil. Cualkier éxito cu nan aparentemente ta alcansá ta meramente temporal, pasobra Jehova ta primintí cu “e speransa mes di esnan malbado lo perecé.”​—⁠Proverbio 10:28.

Esaki ta un spiertamentu pa esnan cu ta profesá di ta cristian, pasobra Jesus a bisa cu algun lo “no tin rais” den nan mes i lo trompecá. (Mateo 13:21) Ademas, apostel Pablo a skirbi tocante personanan cu lo ser “hibá p’aki i p’aya pa tur bientu di siñansa [falsu].” (Efesio 4:14) Con esaki por ser prevení?

Mescos cu e raisnan di un pal’i secoya ta plama extensamente den e suela nutritivo dje tera, asina nos mente i curason mester coba extensamente den e Palabra di Dios i probechá di su awanan dunador-di-bida. Esaki lo yuda nos desaroyá un fe firmemente ancrá. Naturalmente, nos lo sinti e efectonan di pruebanan turbulento. Nos asta por sagudí, mescos cu un palu, ora nos topa cu contratempu. Pero si nos fe ta bon establecí, nos lo proba di tin “rais cu no por ser remové.”​—⁠Compará cu Hebreo 6:⁠19.