“Nan Conocé Su Bos”

“JEHOVA ta mi Wardador.” Esakinan ta e palabranan di apertura di Salmo 23. E Scritura atrobe ta compará Jehova Dios cu un wardador den e profecia di Isaías, cua ta bisa: “Manera un wardador lo e pastoreá su propio tou. Cu su brasa lo e reuní e lamchinan; i den su pechu lo e carga nan. Esnan na lechi lo e conducí cu cuidou.”​—⁠Isaías 40:11.

Di igual manera, Jesucristo ta ser compará cu un wardador. El a bisa: “Mi ta e wardador excelente; e wardador excelente ta entregá su alma na fabor dje carnénan.” (Juan 10:11) Jesus a bisa cu e “carnénan ta scucha bos [dje wardador], i e ta yama su mes carnénan pa nomber i ta guia nan afó.” El a agregá cu “e carnénan ta sigui [e wardador], pasobra nan conocé su bos. Un stranhero nan lo no sigui di ningun manera sino lo hui di dje, pasobra nan no conocé e bos di stranheronan.”​—⁠Juan 10:​2-5.

Tantu Jehova Dios como su Yu, Jesucristo, a actua segun e imágen cu e textonan anterior a describí. Nan ta trata nan carnénan figurativo cu ternura i cuido amoroso. Como resultado, esnan semehante di carné ta sinti nan mes stimá, sigur i protegá.

E relacion aki ta ser compará apropiadamente cu esun di carnénan literal cu nan wardador. Aya na 1831, John Hartley a skirbi tocante su observacionnan relacioná cu esaki. El a skirbi cu na Grecia tabata custumber pa wardadornan duna nan carnénan nomber. Ora e carné ser yamá na su nomber, e ta respondé rib’e bos dje wardador. Rond di 51 aña despues, na 1882, J. L. Porter a haci observacionnan similar. El a testiguá personalmente con wardadornan “ta dal . . . un gritu peculiar skerpi” riba cua e carnénan lo respondé obedientemente siguiendo e wardadornan. E mésun aña ei William M. Thomson a skirbi tocante varios experimentonan cu a establecé cu carnénan por ser siñá pa sigui nan wardador i pa reconocé su bos.

E relacion único aki entre wardador i nan carnénan a ser observá den tempunan mas reciente? Sí. Den e edicion di National Geographic di september 1993, e aventurero australiano Robyn Davidson a skirbi lo siguiente tocante e wardadornan di carné, miembronan di un organisacion social di crio di bestia, na Rabari na nortwest India: “Cada wardador tin gritunan un poco distinto for di otro, manera variacionnan riba un tema. Tin gritu di mainta p’e carnénan sali bai, un gritu pa trece e carnénan na awa, etcétera. Cada homber conocé su mes carnénan i visa versa, i su tou particular lo libra su mes for dje tou mas grandi i sali bai tras di dje parti mainta.”

Sin duda, Jesus a observá loke e cuater biaheronan cu nos a caba di mencioná, a describí. Su mes observacionnan a agregá realidad na su ilustracion dje carnénan conociendo su bos. Abo ta un carné di Jesus? Bo conocé su bos i ta scucha na dje? Si bo reconocé i aceptá su siñansanan como e berdad i si bo obedecé su mandamentunan i sigui su guia den adorá Jehova, e ora ei bo por experenciá e pastoreamentu amoroso i tierno di Jehova Dios i su Yu, Jesucristo.​—⁠Juan 15:⁠10.