Bo Defuntunan Stimá Unda Nan Ta?

ALEC [Pron: alʹek] tabata aplastá. Den un siman, el a perde dos amigu. Un di nan, Nevil, a muri di un herida di bala di skopet. E otro, Tony, a ser matá den un accidente di tráfico. Preguntanan cu e no a preocupá cuné anteriormente awor a molestiá e hobencito surafricano di 14 aña di edad. ‘Pakico hende tin cu muri? I kico ta sosodé despues di morto?’ el a puntra su mes.

Na caminda p’e entiero di Nevil, Alec sinceramente a spera cu lo e haña contesta p’e preguntanan aki. “Pero,” e ta corda, “e pastor a caba di lesa for di un buki i bisa cu Nevil a bai cielu. Anto, na santana, el a bisa cu nos ta spera e resureccion. Mi tabata confundí. Si Nevil tabata den cielu, con e por ta sperando un resureccion?”

Mas despues rib’e mésun dia ei, Alec a asistí n’e entiero di Tony. E sirbishi ritual a ser tené den un idioma cu e no por a comprendé. Sin embargo, e comportacion histérico di algun cu a yora e morto a convencé Alec cu ningun consuelo a ser duná. “E anochi ei,” e ta splica, “mi tabata teriblemente trastorná. Mi a sintí mi desesperá i confundí. Ningun hende por a duná mi contestanan satisfactorio riba mi preguntanan. P’e promé bes den mi bida, realmente mi a puntra mi mes si ta existí un Dios.”

Cada aña miyones di persona, manera Alec, ta perde sernan stimá den morto. E 1992 Britannica Book of the Year ta splica cu “rond mundu tabatin 50.418.000 morto na 1991.” I cuantu miyones mas a muri desde e tempu ei? Imaginá e riunan di lágrima dramá dor di esnan cu a keda atras! Aumentando nan tristesa ta e confusion causá pa puntonan di bista conflictivo tocante morto.

Pues hopi persona, manera Alec, ta desilusioná i ta duda si tin cualkier base pa speransa den un futuro bida despues di morto. Segun e Encyclopedia of Religions, “den tur época, hende pensativo no a sigui e multitud den nan creencianan, . . . dudando con e persona su alma of bida por existí separá for dje persona su celebro i curpa.”

Interesantemente, e encyclopedia mencioná ariba ta admití cu e teoria religioso di un alma inmortal cu ta existí separá for dje curpa no ta ser apoyá den Bijbel. Ta cierto cu na algun lugá, Bijbel ta referí na un persona su “alma” como bandonando e curpa i asta bolbiendo na un curpa morto, pero den e casonan aki “alma” ta ser usá den e sentido di “bida,” perdí of recobrá. (Génesis 35:​16-19; 1 Rey 17:​17-23) Mas tantu biaha, e palabra alma ta ser usá den Bijbel pa describí criaturanan visibel di carni i sanger, sí, criaturanan bibiente. (Génesis 1:20; 2:⁠7) Pues, Bijbel ta declará repetidamente cu alma ta muri. (Ezekiel 18:​4, 20; Echo 3:23; Revelacion 16:⁠3) E Palabra di Dios ta bisa cu unabes e alma muri, e “no ta conciente di nada en absoluto.”​—⁠Eclesiastés 9:​5, 10.

N’e otro banda, Bijbel sí ta contené relatonan di hende morto cu a ser restorá na bida. Den e caso di Lázaro, esaki a sosodé despues cu e tabata morto pa cuater dia. (Juan 11:​39, 43, 44) Kico, anto, lo sosodé cu hende cu a muri cientos of miles di aña pasá? Nan prospecto pa un futuro bida ta rekerí pa Dios resucitá e mes-mésun curpa cu nan a muri cuné?

No. Un pensamentu asina ta inconsistente cu loke ta sosodé atomnan cu ta forma un curpa morto. Cu tempu, algun dje mésun atomnan aki ta ser absorbá pa vegetacion cu, en buelta, ta ser comé dor di otro criaturanan i ta bira parti di nan curpa.

Esaki ta nificá cu no tin speransa pa hende hopi tempu morto? No. E Creador di nos inmenso universo tin un memoria extraordinario imponente i sin límite. Den su memoria perfecto, e tin e capacidad pa retené e personalidad i característicanan genético di cualkier hende morto cu e ta scoge pa corda. Ademas, Jehova Dios tin e poder pa recreá un curpa humano cu e código genético exacto di un persona cu a biba promé. Tambe e por pone den dje e memoria i personalidad di esun cu e ta corda, tal como Abraham.

Casi dos mil aña despues dje morto di Abraham, Jesucristo a duna e siguransa aki: “Cu hende morto ta ser lantá, asta Moises a mustra esei, den e relato tocante e mata di sumpiña, ora e ta yama Jehova ‘e Dios di Abraham i Dios di Isaac i Dios di Jacob.’ E ta un Dios, no di hende morto, sino di hende bibu, pasobra nan tur ta bibu p’e.” (Lucas 20:​37, 38) Ademas di Abraham, Isaac i Jacob, miyones di otro hende morto ta biba den e memoria di Dios, sperando e binidero resureccion. “Lo tin un resureccion di tantu e hustunan como e inhustunan,” Bijbel ta confirmá.​—⁠Echo 24:⁠15.

Un par di siman despues di su pérdida, Alec a haña e contesta riba su preguntanan. Un Testigo di Jehova a yama na su cas i a mustr’é loke e Palabra di Dios ta bisa tocante morto i tocante e resureccion. Esaki a consolá Alec i a duna su bida un nificacion nobo.

Abo tambe kier siña mas tocante e speransa bíblico dje resureccion? Por ehempel, mayoria resureccion lo tuma lugá den cielu of riba tera? I kico un persona mester haci pa gana e aprobacion di Dios i experenciá e cumplimentu di Su promesa maraviyoso cu hende lo por ser reuní atrobe cu e defuntunan stimá?