Bon Nobo For di Malawi!
DIA 15 di november, 1993, e Sociedad Watch Tower Bible and Tract di Pennsylvania a ser registrá oficialmente den e pais di zuidoost Africa, Malawi. Esaki lo duna Testigonan di Jehova reconocimentu legal i libertad pa predicá berdadnan bíblico n’e pueblo di Malawi.
Aya na 1948, un oficina di sucursal dje Sociedad Watch Tower a ser establecí na Malawi pa coordiná e trabou di Testigonan di Jehova n’e tera ei. Dia 8 di januari 1957, e Sociedad Watch Tower a ser registrá ei p’e promé bes. Pa varios aña Testigonan di Jehova a disfrutá di aumento rápido. Pero persecucion violento a cuminsá na 1964. Pakico?
Den obedencia na Dios, Testigonan di Jehova a mantené neutralidad estricto den política. (Juan 17:16) Evidentemente, algun persona no a comprendé masha bon e posicion bíblico aki i a malrepresentá e Testigonan como un religion radical i como criminalnan. P’esei, algun a sinti nan hustificá pa persiguí e cristiannan pacífico aki. Hopi Testigo a ser kitá for di nan trabou, batí i humiyá di otro manera. Algun a ser separá forsosamente for di nan yunan.
Na 1972 mas cu 30.000 Testigo i algun cu tabata studiando Bijbel cu nan mester a bandoná e pais pa temor di perde nan bida. Miles a establecé nan mes den campo pa refugiado n’e pais bisiña, Mozambique. Pero na 1975 e refugiadonan aki a ser mandá bek pa Malawi unda nan mester a enfrentá mas persecucion. Hopi a ser hincá den campo di concentracion. Meimei dje tumulto aki, e Sociedad Watch Tower a ser kitá for dje lista oficial di organisacionnan legal na Malawi. Desde e tempu ei Testigonan di Jehova i nan organisacionnan legal tabata bou di prohibicion n’e tera ei.
Apesar di tur e desaroyonan aki, e Testigonan no a tuma represaya. Nunca nan a forma bomboshi of lanta den protesta contra e gobiernu. Mas bien, huntu cu oracion nan a mantené nan obligacion cristian di mustra debido onor i respet pa ‘autoridadnan gubernamental superior.’ (Romano 13:1-7; 1 Timoteo 2:1, 2) E Testigonan tambe a sostené e normanan haltu di bida cristian skirbí den Bijbel i asina a pone un ehempel excelente den conducta.
Cu nan libertad recientemente hañá, Testigonan di Jehova na Malawi ta determiná pa sigui predicá berdad bíblico urgentemente, “den tempu faborabel.”—2 Timoteo 4:2.
[Caption on page 31]
M. G. Henschel cu e famia di Betel na Malawi den añanan 60