Informe Di Proclamador Di Reino

El a sigi su concenshi entrená bíblicamente

REY David di Israel a pidi e yudanza di Jehova Dios ora el a bisa: “En cuanto ami, lo mi camna den mi integridad. Ai, rescatámi i mustrámi fabor.” (Salmo 26:11) Dios sí a favorecele pasobra el a mantene su integridad. Jehova Dios també a bendiciona Jesús pasobra el a haci e boluntad di su Tata celestial, i el a bendiciona un hoven den Colombia cu a sigi su concenshi entrená bíblicamente i a determiná di haci e boluntad di Dios. E hoven a bisa:

“Ora mi a cuminza studia e Bijbel cu Testigo di Jehova, mi tabata un alumno den un scol católico. Sin embargo, mi concenshi a molestiámi ora mi a bai misa, p’sei mi a bai ne hoofd dje scol (cu tabata un pastor), e guía consehero pa alumno cu problema, i e monitor di mi grupo i a pidié librámi di obligacion di bai misa. Aunque mi a haya e libertad, algun hende a purba di forzámi di bai. E presion a aumenta net despues cu mi a bautiza como Testigo di Jehova. Mi tata a amenazá di sacámi for di cas si nan expulsámi for di scol. E tabatin un educacion di universidad planeá pa mi i un ofishi profesional.

“E hoofd a duna spiertamento bez tras bez pa ken cu no cumpli cu obligacion católico. Ora e tempo a yega pe promé misa di aña, mi a sconde te cu el a caba. Anto mi a duna e maestro (un pastor) un copia dje foyeto La escuela y los testigos de Jehová i a bisé cu como un Testigo di Jehova mi no por bai misa. El a bisámi: ‘Mihor bo cuminza busca otro scol.’ Mi tabata sa cu expulsion for di scol kier men cu mi tata lo sacámi for di cas. No obstante, mi a haci oracion na Jehova i a sigi duna un testimonio cabal na compañé di scol.

“E tempo di vacacion a yega. Anto, bolbiendo na scol despues dje vacacion, tabata tempo atrobé pa misa. E hoofd dje scol i otro pastor tabata dilanti dje capel, cla pa scucha confesion. Mi casi a muri di miedu. Mi a drenta i a sinta, pero mi concenshi a molestiámi. Ora e cantamento a cuminza, mi a pensa, ‘Kico mi ta haci aki? Jehova ta mi Dios. Mi no por bira cobarde i traicioné. Mi no por bandoné. Lo e no bandonámi.’ Den oracion mi a pidi curashi. Anto, mi a sali for dje capel i a para den fila pa haci confesion. Ora mi a yega cerca e hoofd, mi a bisé: ‘Maestro, mi no ta bini pa confesa.’ El a bisa: ‘Mi a imaginámi esei.’ Mi a bisé cu mi tabata dispuesto pa sufri dje consecuencia pero mi concenshi no a permitími participa den misa. Mi no por bai contrario cu loke mi a siña den e Bijbel.

“El a wak mi duro, a dal un sonrisa, i a bisa: ‘Mi ta admirábo. Tur Testigo di Jehova ta merece admiracion. Pa boso, Dios ta promé, i boso ta cla pa obedece su ley cueste loke cueste. Sigi. Bo ta haci mashá bon. Mi deseo ta pa tur hende católico ser mescos cu boso, desplegando tanto celo, tanto amor pa Dios. Djawor padilanti bo ta librá for di participacion den nos servicio religioso.’ Ki yen di gozo mi a keda! Jehova a bendiciona mi determinacion di obedece mi concenshi entrená bíblicamente.

“Su mañán e hoofd a bisa e alumnonan: ‘Otro religion ta dilanti nos. Pakico nos no ta manera nan, celoso, cu un amor profundo pa Dios i un deseo pa sirbié riba tur cos? Esei ta algo cu mester ta den nos curazón.’

“Finalmente e hoofd tabata mandá na Roma, i e hoofd nobo simplemente a pasa por halto dje echo cu mi no a participa. Mi tata a sali for di cas, i a lagámi completamente liber pa alcanza mi meta dje ministerio di tempo completo despues di graduacion.”

Jehova Dios a bendiciona e hoven cu a sigi su concenshi entrená bíblicamente. Lo e bendiciona tur hende di igual manera cu ta purba di haci su boluntad.​—⁠Proverbio 3:​5, 6.