Guia Humano A Fracasá?

KEN a crea tur cos? Si bo contesta ta “Dios,” anto bo ta di acuerdo cu miyones di persona cu ta kere den e Dios di Bijbel, e Creador.

Tog, hopi hende cu ta kere den Dios tin dificultad pa aceptá cu e ta activamente enbolbí den resolvé problemanan di humanidad. Ta realístico pa pensa cu Dios tin un programa andando cu lo trece alivio pa humanidad? Hopi hende no ta haña evidencia razonabel cu esaki ta e caso.

Pa miles di aña, hende a experimentá cu numeroso métodonan cu nan mes a inventá den e búskeda pa solucionnan, excluyendo Dios. Pero hende a haña e solucionnan? Of e problemanan ta birando mas serio i difícil pa resolvé? Con hende ta tratando cu e problemanan urgente den e mundu awe?

Un experto ta bis’é asina’ki: “Desde e revolucion industrial, e paisnan desaroyá a abusá dje recursonan natural dje mundu dor di patronchi di produccion i consumo agotante, causando daño n’e medio ambiente mundial, p’e perhuicio di paisnan den desaroyo.”

Hende ta sigui ruiná e tera. E corant argentino Clarín a comentá: “Den e segundo parti dje siglo aki, cudishi económico, falta di cautela i negligencia tabata responsabel pa desasternan grandi cu no solamente a causa víctima humano sino tambe a degradá e medio ambiente, hopi biaha te na límitenan incalculabel.”

Pobresa extremo awor ta parce di ta un accesorio permanente den sociedad moderno. Asta e asina-yamá paisnan ricu di mundu ta cediendo bou dje peso aplastante di pobresa. Segun The Globe and Mail di Toronto, Cánada, ta ser calculá cu “un tercer parti di tur canades lo experenciá pobresa den transcurso di nan bida ora nan tin edad pa traha.” E corant ta agregá cu “kiebro di famia ta un dje motibunan principal pa pobresa, i e tendencia a acelerá den añanan reciente.”

Abusu di droga ta un otro señal di un sociedad den deterioro. Kico humanidad por haci tocante dje? Evidentemente masha poco generalmente. Miyones di hende ta sigui experenciá degradacion físico, mental i moral como resultado directo di nan abusu di narcótica. I e problema ta plamando manera candela den yerba secu.

Científiconan ta parce di ta perdiendo e guera contra enfermedad. Ta cierto cu tecnologia moderno a gana hopi bataya. Sin embargo, algun procedura científico riba nan mes a contribuí n’e surgimentu di tiponan nobo di microbio peligroso cu ta resistí droga.

Gobiernunan humano no por stop e amplio violacion di derechonan humano. Por ehempel, apesar dje hopi compromisonan i leynan formulá pa prevení sclabitud, ta ser calculá cu rond mundu mas cu cien miyon hende ta ser forsá pa traha bou di condicionnan cu en realidad ta sclabitud miserabel.

Pero pakico guia humano a fracasá? Considerá e factornan aki. Guia humano ta bini di hende​—⁠hende cu tin limitacionnan serio. Nan experencia den bida ta relativamente corticu i generalmente limitá dor di cierto cultura of ambiente. Nan conocimentu ta limitá tambe. Cualkier guia cu nan ta duna ta reflehá e limitacionnan ei. Manera apostel Pablo a bisa, “tur a peca i no ta alcansá e gloria di Dios.”​—⁠Romano 3:⁠23.

En realidad mayoria dje problemanan i dificultadnan cu e mayor parti di humanidad ta experenciando ta e resultado directo of indirecto di ignorá e guia di Dios. Pero unda tal guia por ser hañá? Con Dios ta duna nos direccion awendia? E siguiente artículo lo considerá e contestanan.