Simultáneo pa Diez Aña!

ORA un estimada hermana spañol tabata puntrá con el a sintié diez aña pasá ora La Atalaya a cuminza publicacion simultáneo cu e revista inglés, el a contestá: ‘Nos ta kere cu esei tabata un bendicion pasobra awor nos ta, cómo se dice? na paso cu inglés. Ora mi ta bisa inglés, tur ora mi ta pensa dje organizacion [di Jehova Dios]. Nos ta yama e organizacion “Mama.” Nos ta síntinos den asociacion mashá estrecha cuné. Esei ta bonita! Ta maraviyoso!

E fiel hermana a expresa e sintimento di hopi lector cu no sa leza inglés. Den tempo pasá artículo a presenta den La Atalaya rond di seis luna despues di publicacion na inglés. Otro idioma a experimenta tardamento similar [asta un aña na papiamento]. Ta di comprende cu tabatin un deseo intenso pa publica e mesun informacion, na mesun tempo, na hopi idioma.

Pues cuminzando cu e número di 1 di April di 1984, e revista na spañol tabata e promé pa bira simultáneo cu e revista inglés. Otro idioma a sigi pronto [incluyendo papiamento na 1 di Juli di 1993]. Na principio di 1985, revista na 23 idioma tabata simultáneo. Ora traductor tabata localizá i entrená, revista na mas idioma a alcanza inglés.

E número aki di E Toren di Vigilancia ta marca diez aña di publicacion simultáneo. Awor E Toren di Vigilancia ta publicá na 116 idioma, 85 di locual ta simultáneo. Esei kier men cu 99,3 porciento dje promedio di produccion total dje 16.100.000 copia di E Toren di Vigilancia ta ser producí cu e mesun diseño di capa i artículo. Di esnan cu ta asisti ne Estudio di E Toren di Vigilancia simanal, mas cu 95 porciento ta studia e mesun informacion ne mesun tempo.

Awake! of Despertad!, e revista compañé di E Toren di Vigilancia, ta ser publicá simultáneamente den 37 di su 74 idioma. E Anuario de los testigos de Jehová ta ser publicá na 18 idioma. Tal publicacion simultáneo ta sirbi pa uni e pueblo di Dios den “e mesun mente i den e mesun forma di pensa.”​—⁠1 Corintio 1:⁠10.