Bai Cielu of Fiernu?

“KICO ta bo posibilidadnan di bai cielu of di bai fiernu?”

Básicamente, esei tabata e pregunta den un reciente encuesta na un grupo representativo di mericanonan. E Centro di Investigacion di Religion di Universidad di Princeton a publicá e resultadonan den Religion in America 1992-1993.

Con abo lo a contestá? Kico ta e posibilidadnan pa bo casá of otro sernan kerí bai cielu despues di morto? Bo ta kere ta posibel cu abo, of nan, finalmente lo bai fiernu?

E encuesta a mustra cu 78 porciento a pensa cu nan posibilidadnan di bai cielu tabata bon of excelente, mas cu a contestá asina rond di 40 aña pasá. Fiernu? Rond di 77 porciento a bisa cu e probabilidad di bai ei tabata chikitu.

Nan contestanan tabata basá riba conocimentu exacto di Bijbel? Wel, rond di 4 di cada 10 persona a admití cu nan asistencia na sirbishinan religioso tabata ménos frecuente cu cincu aña pasá. Solamente 28 porciento a pretendé di participá den gruponan di studio di Bijbel i 27 porciento den clas di educacion religioso.

Si bo studia Bijbel cuidadosamente, lo bo haña algun echo sorprendente. Por ehempel, Bijbel ta bisa claramente cu despues di su morto Jesus a bai “fiernu,” segun traduccion di algun version di Bijbel. (Echo 2:​31, King James Version; “Hades,” Traducción del Nuevo Mundo) E Palabra di Dios ta proba tambe cu ni Rey David ni Juan Bautista a bai cielu ora nan a muri. (Mateo 11:11; Echo 2:29) Eseinan ta echonan, no simpel opinion di un encuesta religioso.

Otro echonan cu por afectá bo: Bijbel ta siña cu e apostelnan di Jesus i un cantidad limitá di otronan lo ser hibá cielu pa goberná cu Jesus. Sin embargo, e mayoria di hende cu a muri simplemente a bai e graf comun di humanidad. Dios lo resucitá nan, treciendo nan na bida riba tera cu e prospecto di un bida completo, felis i sin fin den un paradijs terenal restorá.

Testigonan di Jehova gustosamente lo yudá bo establecé for di bo propio Bijbel e base confiabel pa tal speransa.