Manera Apel Di Oro

APEL​—⁠cuantu nan ta deleitá tantu e wowo como e paladar ciel’i boca! Bijbel ta usa e fruta delicioso aki den un comparacion interesante ora e ta bisa: “Manera apel di oro den grabacion di plata ta un palabra papiá n’e tempu apropiado p’e.” (Proverbio 25:11) Kico e declaracion aki ta nificá?

“Apel di oro den grabacion di plata” por denotá obra di grabacion, manera un teblachi di plata grabá cu fruta di oro riba dje. Siendo cu e versículonan anterior den e capítulo aki ta mencioná acercamentu na un rey, e versículo aki por referí na regalo cu ta ser duná na un gobernante​—⁠adorno di oro den forma di apel poné riba teblachi di plata. (Proverbio 25:6, 7) Impresionantemente bunita, en berdad!

Tin un bunitesa similar den palabranan apropiado, nobel i oportuno, sea skirbí of papiá. Nan ta deleitabel, animador i beneficioso den hopi manera. Specialmente e contenido divinamente inspirá di Bijbel ta bunita manera “apel di oro den grabacion di plata.”

Manera Rey Salomon su dichonan sabí na Proverbio 25:11 ta ilustrá, el “a busca pa haña e palabranan deleitabel i e skirbimentu di palabranan corecto di berdad.” (Eclesiastés 12:10; Proverbio 25:⁠1) Siglonan despues, apostel cristian Pablo a skirbi: “Tur e Scritura ta inspirá pa Dios i ta probechoso.” (2 Timoteo 3:16) Sí, Bijbel ta contené conseho probechoso, profecia, descripcion di palabra i berdad di tal splendor briyo i bunitesa cu nan ta surpasá grandemente obra dje artesanonan di mas excelente. Ademas, ken cu ta gana sabiduria dje Palabra di Dios, Bijbel, ta adkerí un posesion preciosísimo i por carga e speransa di bida eterno.​—⁠Proverbio 4:​7-9; Juan 17:⁠3.