Cristiannan Celoso di Inglatera

Ménos cu 10 porciento dje 56 miyon hendenan di Inglatera actualmente ta cristiannan celoso, segun The Economist. Riba un djadumingu típico, ménos cu cuater miyon hende ta asistí na servicionan di iglesia. Di esakinan, solamente 1,1 miyon ta anglicano. Sin embargo, apesar di agnosticismo plamá, e Iglesia di Inglatera ta sigui cu su papel establecí como e religion di Estado. “Inglatera no ta un sociedad cristian pa hopi aña pero ta nenga di admití agnosticismo, pa gran parti debí na nostalgia,” segun e mesun revista di noticia ta afirmá. Nada straño cu políticonan moderno i corantnan ta exigí separacion di Iglesia, un kiebro den e relacion Iglesia-Estado.

“Un mundu cu ta realmente seglar, cu ta profesá di ta cristian, ta e pió di mundunan,” Walter Bagehot, e redactor di siglo 19 di The Economist, a lamentá. Pero den e promé siglo E.C., Jesucristo a bisa cu su disipelnan ‘no tabata parti di mundu, mescos cu e no tabata parti di mundu.’ (Juan 17:16) Sin embargo, el a manda nan den e mundu pa predicá e Reino di Dios. Di igual manera awe, Testigonan di Jehova mundialmente ta bon-conocí pa nan predicacion celoso “públicamente i di cas pa cas.”—Echo 20:20.

Compará cu e anglicanonan, e 126.173 Testigonan na Inglatera ta poco na cantidad. Tog nan ta dedicá rond di 20 ora pa luna asistiendo na reunion cristian. Ademas, durante 1992 cada Testigo a dedicá un promedio di 16 ora adicional pa luna declarando na otronan e bon nobo dje Reino di Dios, e gobiernu cu pronto lo establecé un hustu mundu nobo. (Mateo 24:14; 2 Pedro 3:13) E siguiente bes cu Testigonan di Jehova bishitá bo cas, lo bo scucha na nan mensahe distintivo i descubrí loke ta motivá nan celo?