E Tempo di Cosecha!
DURANTE e pasado, pakico “cristianismo” tabata tanto no cristian? Hopi hende pensativo ta haci e pregunta ei, pero Jesús a contesté casi 2.000 aña pasá den un comparacion. El a conta di un “homber cu a sembra bon simía den su cunucu.” Anto, “su enemigo a bini i a sembra mal yerba den e trigo.” Ora e simía a nace, trahador a ripara e mal yerba i kier a ráncanan. Pero, e doño a bisa: “Laga nan dos crece hunto te ne cosecha.” Ne tempo di cosecha, nan por a separa e trigo for dje mal yerba.—Mateo 13:24-30.
Jesús, splicando e comparacion, a bisa cu e mes tabata esun cu a sembra “bon simía”, es decir, cristian berdadero. E enemigo ta Satanás, cu a sembra “mal yerba”—infiltrando cristian falso den e congregacion. Jesús a permiti cristian falso i berdadero existi hunto—pero solamente te ne cosecha. Anto, nan lo ser separá.—Mateo 24:36-44.
P’sei, no ta un sorpresa pa nos ora nos ta siña cu organizacion “cristian” pa siglonan a desonra Dios, adoptando doctrina pagano, pasando por halto di inmoralidad, apoyando gera pa domina otro país, i practicando e inquisicion cruel. Nos ta reconoce den esei e mal simía cu Satanás a planta. Sin embargo, ora nos ta leza di hende individual cu a sufri di encarcelacion i morto mas bien cu compromete principio bíblico, nos ta mira cu e bon simía no tabata exterminá.
Jesús a bisa cu e cosecha ta e “conclusion di un sistema di cosnan.” Siendo cu nos ta biba den e conclusion dje sistema mundial di cosnan actual, esaki mester ta e tempo di cosecha! P’sei, un separacion mester ta tuma lugar entre cristian berdadero i falso. Awe, mester existi un pueblo, no simplemente hende individual plamá, cu ta cuadra cu e identificacion cu Jesús a duna di cristian berdadero—cu ta sumiso ne Reino di Dios i ta predica e bon nobo tocante dje, cu ta promove moralidad cu fundeshi bíblico i cu ta rechaza doctrina pagano i ta acepta e berdad bíblico, cu ta duna di conoce e nomber di Dios i cu no ta parti di mundo.—Mateo 6:33; 24:14; Juan 3:20; 8:32; 17:6, 16.
Nos ta dunábo a siguranza di cu ta existi un pueblo asina! Bo kier sirbi Dios na moda cu e ta acepta? Anto busca e pueblo ei, i sirbi Dios hunto cu nan.