Hamber Profetizá

DEN añanan reciente e presencia spantoso di hamber a bira penosamente conocí den informe di noticia mundial. For di Etiopia i otro parti a bini portret inolvidable di sufrimento. Na 1992 e atencion di mundo tabata fihá riba víctima trágica di hamber den Somalia, cu secura i gera a causa. E curant International Herald Tribune a informa den September di 1992: “Ningun hende sa cuanto hende a muri den Somalia, pero Cruz Roja ta bisa cu tabatin mas cu 100.000. Cientos, si no ta miles, ta muri tur dia.”

Cifra realmente no ta comunica e miseria i dolor di hende enbolbí. Yvette Pierpaoli, representante europeo di Refugiado Internacional, a skirbi den Refugees, e revista di NU: “Sea den New York of Genebra, e cuestion di refugiado ta parce basta francu; cifra citá i e cantidad di cero despues di nan ta dificultoso pa comprende. Pero miles di miya ayá, riba frontera di país cu no ta bao di control mas, emocion ta cogébo pa garganta i e magnitud dje sufrimento ta dunábo gana di grita.”

Aunque Cruz Roja ta bisa cu su esfuerzo pa yuda Somalia ta representa su trabao humanitario mas grandi di duna alivio te awor, hopi observador ta keha cu e imagen general ta cu tin mucho poco yudanza, mucho laat. Pierpaoli a lamenta: “País cu a haci contribucion no tin gana di sigi, i a cansa di apoya un Africa cu ta desintegra. . . . Nan ta culpa africano pa nan mal maneho, pe golosidad di nan lider, pe conflicto cu ta parce sin fin.”

E Bijbel ta profetiza di un tempo ora cu lo tin scarcidad di cuminda “den un lugar tras di otro.” Tal scarcidad, hunto cu hopi otro suceso, tal como gera, temblor, i pest, ta indica cu e Reino di Dios ta cerca. (Lucas 21:11, 31) E Bijbel ta sigi mustra cu bao dje bondadoso Reino di Dios, lo tin un abundancia di cuminda pa tur humanidad. E salmista a skirbi: “Lo yega di tin basta grano riba e tera. Na top di montaña lo tin un sobreabundancia.”—Salmo 72:16.