Pregunta di Lector

Na Romano 9:3, apostel Pablo a skirbi: “Mi por a deseá cu mi mes a ser separá di Cristo como esun maldicioná na fabor di mi rumannan, mi famianan segun carni.” Pablo tabata kier men cu lo el a sacrificá su bida pa salba compañé hudiu?

Jesus a pone e ehempel di amor dje grado mas haltu. E tabata dispuesto pa entregá su alma, of bida, pa humanidad pecaminoso. Durante su ministerio público, el a gasta su mes pa su compatriotanan—hudiunan—di manera cu mas tantu hende posibel lo tabata entre esnan cu lo a beneficiá di su sacrificio di rescate. (Marco 6:30-34) Nan desinteres i oposicion n’e mensahe di salbacion nunca a fria Jesus su interes amoroso p’e pueblo hudiu. (Mateo 23:37) I el a laga ‘un modelo pa nos sigui su pasonan.’—1 Pedro 2:21.

Ta posibel pa hende imperfecto sigui Jesus su ehempel di amor? Sí, i nos por mira un ilustracion di esaki den apostel Pablo. E tabata asina interesá den co-hudiunan cu, motivá pa amor pa nan, el a bisa cu lo e por a deseá cu e mes a ser “separá di Cristo como esun maldicioná” na nan fabor.

Pablo a usa ei un forma di hypérbola, of un exageracion, pa trece su punto. Jesus a usa un exageracion similar na Mateo 5:18, ora el a bisa: “Cielu i tera lo pasa promé cu di algun manera un dje letternan di mas chikitu of un pida di un letter pasa for dje Ley sin cu tur cos tuma lugá.” Jesus tabata sa cu cielu i tera lo no pasa. Ni Pablo lo no a bira maldicioná, mescos cu tur hudiu lo no a aceptá cristianismo tampoco. Pero Pablo su punto tabata cu lo el a haci prácticamente tur cos pa yuda e hudiunan probechá dje medio di Dios di salbacion mediante Jesucristo. Nada straño cu e apostel por a animá compañénan cristian: “Bira imitadornan di mi, mescos cu ami ta di Cristo”!—1 Corintio 11:1.

Awe, cristiannan mester tin e mesun interes cu Jesus i Pablo tabatin pa hende no-creyente. Nunca nos mester permití falta di interes of oposicion abierto di hende den nos teritorio di duna testimonio, fria nos amor pa nos próhimo i nos celo pa yuda nan siña e caminda di salbacion.—Mateo 22:39.