Debilitacion di Enlace Matrimonial

UN MAMA hóben tabata cariciá su baby di dos luna. Anto, den un atake di rabia diripiente, el a lagu’e cai na suela. E mucha a muri un par di ora despues. E mama a bisa, “Mi a lagu’e cai pa malu, pasobra mi casá no ta preocupá pa su famia.” En bes di papia e asuntu cu su casá, el a baha su rabia rib’e baby inocente.

Poco mama ta recurí na un medida asina extremo, pero hopi ta compartí su sintimentunan. Ta birando mas i mas difícil pa parehanan casá haci nan matrimonio exitoso. Journal of Marriage and the Family ta bisa cu “Ora e probabilidad di éxito matrimonial ta asina abou manera e ta awe na Merca, pa traha un compromiso fuerte i incondicional pa un matrimonio . . . ta asina peligroso cu ningun persona completamente racional lo haci’é.”

Den e tempu turbulento aki, inmoralidad, incompatibilidad, debe, friccion cu suegronan i egoismo, tur ta contribuí na pleitu den cas, cu hopi biaha ta escalá den divorcio. E situacion ta asina serio na Hapon cu asta e Iglesia Católico, famoso pa su posicion fuerte contra divorcio, mester a establecé un comité special pa suavisá e discriminacion entre católiconan contra esnan cu a divorciá i bolbe casa. Un cantidad aumentante di baidó di misa ta ser afectá pa problemanan relacioná cu divorcio.

Sin embargo, e cantidad di divorcio ta revelá solamente e punta dje ceru di ijs. Investigacion na Merca ta mustra cu ta e calidad degenerando di bida matrimonial mes cu ta causa dje aumento di divorcio, mas bien cu solamente un tendencia social cu ta haci divorcio mas fácil. Cu ménos esfuerso i compromiso, bida matrimonial ta perde su briyo. Hopi ta mantené e aparencia exterior di ta un pareha casá, pero nan no ta compartí kamber di matrimonio, i nan apénas ta papia mes cu otro. Algun ta sinti mescos cu e muher oriental kende a cumpra su propio graf separá, bisando, ‘Mi no kier ta cu mi casá den graf.’ Incapas pa divorciá di su casá awor, e kier logra un divorcio despues di morto. Ta tristu cu aunke hende asina no ta divorciá, bida matrimonial no ta un fuente di felicidad pa nan.

Esei tabata e caso cu Isao. El a casa pa capricho, pues e no a sinti ningun motivacion pa cambia su moda egoista di biba. Aunke e tabatin un bon salario como chofer di truk, el a malgastá tur su entrada na comementu i bebementu, sin percurá pa su famia. Como resultado, constantemente e tabatin pleitu cu su casá. Isao ta recorda cu “ki ora cu cosnan a salí mi di malu, mi a bai cas i baha mi rabia riba mi famia.” Mescos cu un volcan cu no a calma, e tema di divorcio tabata explotá tur dia.

Hopi homber i muher ta soportando un mal matrimonio. Sea cu nan ta divorciá of no, nan no ta hañando felicidad. Tin un manera pa nan haci nan matrimonio exitoso? Kico por haci pa fortalecé nan enlace matrimonial?