Informe di Proclamador di Reino

Un Aficionado Hoven di Trein A Siña e Berdad

SI E curazón di hende ta incliná na husticia, anto Jehova Dios, usando Jesucristo i angel celestial, lo percura pa tal hende semehante di carné yega na contacto cu e bon nobo di Reino. Na su debido tempo, tal hende por yega na man drechi di fabor di Jesús. (Mateo 25:31-33) Esei tabata cierto di un hoven, un aficionado di trein den Austria cu a yega di conoce e berdad di manera extraordinario.

E parti mas excitante dje hobby dje hoven tabata di corre den cabina di locomotor, cu permiso di administracion dje compañía. El a graba cada biahe cu su cámara di video di manera cu e por a repasánan atrobé den su cas. Na un biahe cu el a haci for di Viena te na Salzburg, e treinmashinist tabata un Testigo di Jehova. El a probecha dje oportunidad di papia tocante e reino cu e aficionado. Na principio e hoven a haya sorpresa pa tende e mashinist papia tocante Dios i e Bijbel, pero durante e biahe, el a concentra mas riba e bonita bista en bez di riba loke e mashinist a bisé.

Ora el a yega cas atrobé, e hoven aficionado a wak e grabacion di su video no un biaha so sino diez bez, pasobra e tabata mashá interesá den e biahe. Siendo cu el a graba e sonido també, el a tende bez tras bez loke e Testigo a bisé. Mientras mas el a wak e video, mas el a tende loke e mashinist a bisé. Awor el a cuminza pensa tocante dje, i finalmente el a bira entusiasmá tocante e informacion maraviyoso presentá for di Bijbel. El a deseá di sa mas.

El a corda e fam dje mashinist i tabata sa cu el a biba den Viena. P’sei el a bai postkantoor i a cuminza yama na telefón tur hende cu e fam ei den e buki di telefón. E pregunta cu el a haci hende cu a contestá e telefón tabata: “Bo ta treinmashinist?” Si nan a contestá cu no, el a yama otro number. Finalmente, el a haya e treinmashinist. El a conta su cuenta ne mashinist i a bisé cu e ta interesá den e mensahe dje Bijbel cu el a tende riba e video.

E Testigo a haci arreglo pa medio dje oficina di sucursal pa un hende cu a biba cerca e hoven bishité. Pa casualidad, den e congregacion local, tabatin un otro Testigo cu també tabata treinmashinist. E otro mashinist a bishita e aficionado di trein, i a cuminza un estudio bíblico cuné. Den berano di 1991, e hoven a bautiza.

Jehova Dios, cu ta scudriña tur curazón, mester a mira cu e persona tabatin un amor sincero pa husticia. P’sei, el a poné na contacto cu e berdad dje Bijbel—aunque esei tabata na moda extraordinario.—1 Crónica 28:9; Juan 10:27.

[Rekonosementu pa plachi na página 9]

Cortesía di Austrian Railways