“Un Señal Fo’i Cielu”
UN POESIA bieu ta bisa: “Cielu corá anochi, nabegantenan ta alegrá, /Cielu corá mainta, nabegantenan ta tuma precaucion.” Awe, satélite, studio di temperatura mehorá dor di computer, radar di Doppler i otro medionan científico ta ser usá pa pronosticá weer. Prediccionnan hopi biaha ta na armonia cu e poesia mencioná ariba.
Un biaha Jesucristo su enemigunan religioso a exigí di dje “un señal fo’i cielu,” un manifestacion excepcional pa proba cu e tabata e Mesías. El a bisa: “Ora nochi ta cera, boso tin custumber di bisa, ‘Lo tin bon weer, pasobra cielu ta corá kimá’; i mainta, ‘Awe lo ta friu i cu tempu di awaceru, pasobra cielu ta corá kimá, pero di un aspecto tristu.’ Boso sa con pa interpretá e aparencia di cielu, pero e señalnan dje tempu boso no por interpretá. Un generacion malbado i adúltero ta sigui busca pa un señal, pero ningun señal lo ser duná cu excepcion di e señal di Jonas.”—Mateo 16:1-4.
E enemigunan di Jesus por a pronosticá e weer pero tabata incapas pa comprendé asuntunan spiritual. Por ehempel, kico di “e señal di Jonas”? Despues di a pasa rond di tres dia den barica di un piscá grandi, e profeta di Dios, Jonas, a predicá den Nínive i asina a bira un señal p’e stad capital ei di Asiria. E generacion di Jesus tabatin “e señal di Jonas” ora Cristo a pasa tres dia den un graf i a ser resucitá. Su disipelnan a proclamá e evidencia di tal suceso i asina Jesus tabata un señal p’e generacion ei.—Mateo 12:39-41.
Na un otro ocasion, e disipelnan di Jesus a pidi’é pa “e señal” di su futuro “presencia” den poder di Reino. Como contesta, el a duna un señal combiná consistiendo di varios rasgo, incluyendo guera sin igual, temblor grandi, scarcedad di cuminda i predicacion mundial tocante Dios su Reino celestial establecí.—Mateo 24:3-14.
Bo ta reconocé e señal dje presencia di Cristo como e Rey celestial invisibel? Su rasgonan ta ser cumplí rib’e generacion aki. (Mateo 24:34) I kico di futuro? Bijbel no solamente ta revelá cu e fin dje sistema di cosnan aki ta cerca sino tambe ta pronosticá Dios su dia nobo primintí cu pronto lo manecé claro i briyante pa humanidad.—2 Pedro 3:13.