El a Gana e Premio

“MI TA debe tur cos na boso,” Kiyoé, den su último aña di scol segundario, a skirbi ne oficina di sucursal dje Sociedad Watch Tower den Hapón. Pakico el a expresa tanto gratitud? Recientemente, Kiyoé a recibi e premio mayor den e concurso nacional di opstel, cu e respaldo dje Asociacion di Siguridad di Tráfico di Hapón. E premio balioso ta inclui un biahe pa Suecia.

Kiyoé a skirbi pa expresa su aprecio pe cantidad di publicacion excelente dje Sociedad Watch Tower Bible and Tract, cu, den su opinion, a yudé mashá pa gana. Además dje concurso, el a representa su scol den hopi concurso di oratorio i opstel. El a bisa, “Den e mayoría di tal concurso, nan ta duna studiante un tema i nan ta haci investigacion den biblioteca pa nan opstel. Pero, mi no tin cu molestiámi asina hopi. Mi ta haya informacion excelente den nos cashi di buki na cas!” El a sigi: “Apesar dje tema, sea cu ta riba problema di behez, e ambiente di mundo, relacion internacional, of mehoramento di nos aptitud, generalmente tin un consideracion a fondo den e revista Toren di Vigilancia of Despertad!”

Sin embargo, no ta e literatura so cu a yuda Kiyoé. El a bisa cu e educacion cu el a recibi den programa di siñanza di Testigo di Jehova a yudé mehora su lezamento i skirbimento, i esei a hacié sobresalí den e concurso. E ta admiti, “Na antes ami realmente a deseá un educacion den universidad. Pero, unda mi por obtene un educacion manera esaki?” Awor e ta spera di traha den e sirbishi di tempo completo yudando otro hende probecha dje educacion cu el a recibi. Aunque e ta keda mashá contentu cu e premio dje opstel, e curazón di Kiyoé ta determiná di gana e premio di bida.—Compara cu Filipense 3:14.